Un bon siman na tur nos lektornan...

Despues di un fakansi bon meresí nos tei bजk pa dje forma ei kompartí ku bo den nos kolumna ‘Louie Louie’... 

Ma bai bin bèk haña mi ku yen aktividat riba otro...

Siman di Kultura i Turismo, Siman di LGBT, Boca Beach Music Festival, Restaurant Week i asina por sigui menshoná...

Demasiado aktividat riba otro siendo ku esaki por keda reglá masha bon mes...

Pa kuminsá segun mi e selebrashon di Siman di Kultura i Turismo a keda mov’é for di su siman normal i bin fin di luna i esaki a pone ku el a kai pareu ku e siman di LGBT...

Mi ta kere ku Ofisina di Turismo mester tin un kalènder di aktividatnan ku ta tuma lugá anualmente i nan tambe ta un dje spònsernan di e siman di LGBT, pues kon por ta posibel ku bo ta laga move esun di kultura pa e bin topa LGBT...

Ya, na Kòrsou tur kos ta posibel...

Segun mi nos a yega dje leu ei i aki mi ke kompartí ku un konosí di mi ku a bisa ku mester bin ku un Siman di Turismo apart, kaminda ta enfatisá e importansia ku Turismo tin pa nos pais...

Den e siman di turismo ei nos por tin e ‘Restaurant Week’ tambe, pasó nan dos ta kana huntu...

Ahn ma lubidá riba ‘Dia di Banda Bou’ tambe ku a keda selebrá ayera...

Tur e aktividatnan aki riba otro ta suak otro...

Mester aploudí si e kalènder di aktividat di Fundashon Kas di Kultura ...

Mas promoshon pa sierto dje aktividatnan sigur lo a pèrkurá pa mas asistensia...

Un biaha mas mester wak den direkshon di medionan di komunikashon ku tambe ta hunga un ròl importante den esaki pa propagá eventonan kultural ku ta tuma lugá den kuadro di Siman di Kultura...

Juni Aniceta i su grupo JAG a risibí e mandato di Gobièrnu di Kòrsou pa organisá Karnaval pa 2 aña...

Nos ta den inisio di luna di òktober i mester traha lihé riba e diferente aktividatnan ku tin ku tuma lugá...

Ta fresku den mi memoria kon na 2015 a duna MEO tambe e mandato na final di sèptèmber 2015...

Ban spera ku gremio komersial lo duna su aporte na selebrashon di Karnaval, pasó te ainda Gobièrnu no ta mira òf no ke mira ku 350 mil florin bo no por organisá Karnaval ku tur ingrediente manera mester ta...

Na Merka Hugh Hefner, e hòmber di ‘Playboy Magazine’ a fayesé i segun informashon ayera nochi lat nan a der’é djasabra banda di Marilyn Monroe...

Marilyn tabata e promé dama ku a aparesé riba e portada di ‘Playboy’...

Mi tei move, fakansi a kaba i mester bai trabou bèk pa sigui duna mi aporte na e adelanto di nos Pais...

Bon siman!...