Un bon siman na tur nos lektornan...

Un fin di siman kargá ku evento i bo por a mira klaramente e eskoho ku públiko a tuma ...

Un bon show di Reggae, pero e asistensia si a laga di deseá, esei ta loke ‘Louie Louie’ por a komprondé...

Nos no a bai, pero un fuente di konfiansa a informá dje resultado...

E echo ku a posponé e evento i but’é riba un fecha kaminda ya kaba tabatin 2 evento ku públiko tabatin interes di dje, bo por a spera ku e resultado lo no tabata manera nan a deseá...

‘Chimbala’ a bai bon! E públiko amante di músika dje artista a yena tur huki den Saliña pa nan parker nan outo i asistí ne konsierto...

Meskos te kaso na WTC kaminda e di dos edishon di ‘Kings of Hits’ a bolbe resultá un éksito kompletu...

E públiko einan a pasa dje bon ei ku te asta ora e evento a kaba, tabatin algun damita ku a baha bai laga sapatu atras...

Ma hasi ‘60’ mas serio, e promé post di sapatu lagá atras tabata di dje...

E sapatunan ei ta indikashon bon kla ku mester a saka pia afó pa por baila i gosa na antoho...

E evento kultural ‘Ser’e Bunita – E Bataya’ a bai basta bon, e kantidat di públiko no a reflehá e kantidat di karchinan ku a keda bendí pa e evento...

Hopi hende a koperá kumpra karchi, pero al final no a presentá segun nos por a komprondé...

‘Louie Louie’ a tuma nota di e folder ku potrèt ku grupo di Karnaval ‘Viva E Grupo’ a presentá riba retnan sosial...

Tremendo trabou dje grupo i potrètnan master saká di Thareyck Martina a pone e grupo lusi mes!...

Guito, Sharvelo i henter tim di Viva E Grupo ku pa Karnaval 2020 ta bai presentá ‘Bontu – ‘The Mythical art of Africa’ ...

Durante dje Parada di Alegria di ayera a sosodé algu insólito...

E Parada di Alegria ku a keda organisá pa hóbennan ku ta sufri di ‘Down Syndrome’ a konta ku animashon di dj...

Loke ta inaseptabel ta e tipo di músika ku un dje djnan aki tabata presentá durante dje marcha...

Kansion ku palabranan kompletamente for di òrdu pa e okashon...

Un evento públiko i ku hóbennan riba trailer mester di sigur mas atenshon pa e repertorio ku bo ta toka komo dj...

Hopi di lamentá...

Nos a drenta e luna di desèmber, un kantidat di aktividat pendiente...

Studiantenan for di eksterior a kuminsá regresá kas...

Aktividatnan popular ku ta tuma lugá durante di siman for di awor tei kuminsá yena mas ku kustumber...

Nos ta spera ku tur hende ta gosa, pero ku komportashon mas ku tur kos lo ta esun di mas mihó!...

Bon siman !