Siman a parti na dos aki...

AMAK a tene su reunion i a presentá algun proposishon pa kambionan ku tin ku tuma lugá...

E proposishon di ‘Wild Card’ ta un ku a keda aseptá i mester wak kon e reakshon di esaki lo bai ta despues di 2020...

E plan pa 2020 ta fásil ainda, pasa e 10 tumbanan ku ta den ‘wild card’ riba pantaya grandi i hurado ta bolbe skohe...

Pa 2021 lo tin kambio grandi na momentu ku e final di Festival di Tumba lo move pa djasabra anochi...

Na mi opinion mester studia e kambio aki, pasó lo e impliká ku por ehèmpel Buleria ku tin kustumber di partisipá na Festival di Tumba lo no por hasi esaki, debí ku e final di Kaiso na Aruba ta tuma lugá riba e djasabra ku lo tin final aki na Kòrsou...

Gastunan pa organisá Festival di Tumba tambe lo subi, mirando ku e idea ta pa riba e djaweps ku awor ta liber, lo bira e anochi kaminda e 10 tumbanan ku ta den ‘wild card’ lo mester presentá ku nan banda!...

E idea ta un bon idea, pero segun mi mester a hasi un estudio finansiero pa wak ki gastu e ‘wild card’ lo trese kuné...

Great pa tuma nota ku ‘Viva Kids Recycle Band’ a bolbe produsí un kansion ...

E proyekto ta un di aploudí i nan meresé sosten ...

Ayera tabatin alrededor di 9 mil turista ku a yega Kòrsou riba barku krusero, pa awe ta spera 10 mil turista di bishita...

Nos mester probechá pa e oportunidat úniko aki pa promové e isla pa dje forma ei un porsentahe regresá Kòrsou pa un bishita mas largu...

Awe mainta Morgan Isenia lo tin un programa spesial kaminda e lo presentá e éksitonan di mas grandi di Mr. Honing, Nildo Martis di felis memoria...

Ta manera Morgan ta promové, no ta tumba so, pero hopi montuno i otro géneronan di músika Nildo a komponé i interpretá...

Un baluarte musikal sigur!...

Ma tuma nota tambe ku AMAK a logra di atraé dos partner mas pa Festival di Tumba, esaki sigur ta un nota positivo...

Nan ta pendiente pa den e promé siman di yanüari tene nan rueda di prensa pa anunsiá tur detaye pa Tumba 2020...

Ma kombersá ku miembro di tim di maneho di un banda popular i el a indiká na mi persona ku nan agènda ta yen ku fiestanan privá den luna di desèmber aki...

Parse ku ounke ta bisto ku situashon ekonómiko no ta di kanta makamba, empresanan ta tene nan selebrashon di fin di aña, podisé un tiki mas moderá pero nan ta tumando lugá...

Buelonan for di Ulanda tambe ta yen, e hendenan ta biniendo abou pa selebrá Pasku i Fin di Aña na kas...

Pa awe t’e aki, djabièrnè nos tei bèk ku poder di Dios ku otro edishon di ‘Louie Louie’...