Un bon siman !

Wikènt ta tras di lomba, un sin fin di fiestanan di fin di aña di empresanan lokal kaminda dj i bandanan lokal a risibí un bon boká for di esaki...

Ounke pa sierto dje empresanan nan a baha man na selebrashon tin otronan ku a bai ‘all out’ ku nan selebrashon...

Trahadónan a kumpli ku metanan pa 2019 i doño di trabou ta kumpli ku e deseo di selebrashon di fin di aña...

Djasabra anochi tabatin e konsierto di piano ‘Traces of Chopin’ ku a tuma lugá na Villa Maria ku presentashon di pianistanan Randal Corsen i su kolega Polako Janusz Olejniczak ...

Un konsierto ekstraordinario kaminda a hasi grabashon pa e dokumental ku te awor yama ‘Chopin’s Ragtime’...

E grabashon próksimamente lo keda presentá durante di Curaçao International Film Festival Rotterdam...

Randal ku su konhunto a bolbe skor durante di su presentashon...

Ayera nochi a tuma lugá e klousura dje aña di Ka’i Orgel...

Un bon públiko riba Plasa Brion pa disfrutá dje presentashon tantu di músika i baile ku a tuma lugá...

Awor ku nos a yega na final dje aña aki, ta bon pa sigui traha riba e promoshon di nos kultura i skohe un otro ritmo òf evento kultural pa dun’é atenshon i asina kontribuí na kresementu di un nashon...

E ‘Ham ku Ayaka’ di Stanley Clementina i Dongo ta dal masha bon mes...

Un tiki dòbel sinti, pero sigur ta trese un ambiente den fin di aña...

Den pasado tabatin hopi komposishon ku ta keda produsí spesialmente pa fin di aña, durante dje último añanan a mengua hopi, pero kada biaha ku un di nos artistanan produsí algu esaki ta karga ku ambiente i ta keda zona durante di henter e temporada...

Buleria ta ‘tròt den bòm’ ku produkshonnan musikal pa fin di 2019, awó ta ‘Comfort Zone’ nan a lansa riba merkado...

E kombinashon di ‘Pinky & the Brain’ ta sigui produsí éksito, Quincy i Dwight ta sigui kosechá éksito ku nan produkshonnan...

Tin un kompositor/ areglista ku a yega 10 tumba kaba ku e sea a komponé, a areglá òf ta trahando riba dje pa Festival di Tumba 2020...

Tin un otro tambe ku semper tabata kontribuí grandemente ku su areglonan ku tin basta trabou e dianan aki i ta preparando pa areglá tumba pa diferente kompositor/ kantante...

E selebrashon di 50 aniversario di Festival di Tumba tei bira algu grandi i AMAK ta trahando duru pa por surpasá tur espektativa pa ku e selebrashon grandi...

Un siman di goso total lo tin durante dje último siman di yanüari 2020...

Kantantenan tur ke bai ku un bon tumba pa gana, selebrashon di 50 ta pone ku bo ke marka bo nòmber den historia dje festival...

Falta 15 dia pa nos yega na fin di 2019, ban sigui traha pa hiba nos dushi Kòrsou padilanti! Bon siman!!!!