Un felis dia…

Poko poko nos ta yegando e dianan di fiesta…

Great di mira e entusiasmo di parti di katólikonan pa bishita misanan di Ourora...

Kaya ta drùk mainta trempan ora tur hende sali Misa...

Lugánan ku ta bende ko’i kome mainta ta haña un benta èkstra di esnan ku ta sali misa buska ko’i kome...

Ayera nochi ma topa un mener den un toko i el a puntra mi kiko mi ta pensa di e ‘Wildcard’ di Festival di Tumba...

Ora ma kaba di splik’e mi punto ku mi ta mir’é komo un di dos chèns pa esnan ku no a logra di klasifiká...

Su pensamentu ta ku ‘Wildcard’ por ta pa solamente 1 òf mas komposishon ku ta bin èkstra, pero no por perhudiká esnan ku a klasifiká kaba...

E tin un punto, pero loke ta e desishon esaki a keda tuma den un reunion di AMAK i si miembronan no ta di akuerdo ku e desishon nan mester tabata presente na e reunion pa a vota pro òf kontra di e proposishon...

Aworakí ta wak kon e promé biaha di ‘Wildcard’ ta bai pa wak si miembronan ta pone komo punto di agènda pa e siguiente reunion di AMAK relashoná ku Festival di Tumba...

Un komentario positivo mi tin di e jingle di fin di aña di TeleCuraçao...

Un bunita produkshon ku un tremendo produkshon musikal di Dwight Leoneta i su tim...

Nos ta pendiente pa wak esun di Tv Direct ...

Ya potrèt riba retnan sosial a kuminsá sali di kantantenan ku ta trahando riba nan tumba huntu ku kompositor i areglistanan...

Otronan ainda tin nan partisipashon skondí...

Nos ta na altura tambe di un gran tumbero ku pa 2020 a opta pa no partisipá, esaki despues ku e no a risibí un komposishon ku ta un pa bai kompleto kuné i ku e ta sintié na kas kuné...

E kos ei ta masha importante sigur ora ku bo a yega di bisti korona den pasado...

E echo ku bo a gana òf klasifiká haltu, bo no ke bai hasi mal papel den e festival mas grandi di Kòrsou i di abla Papiamentu...

Ayera nos a tuma nota ku un konosido músiko a djòin un partido polítiko...

Eksito hermano!...

‘Chopochopo’ a bolbe resultá un éksito ku nan estreno ku a tuma lugá den wikènt ku ta tras di lomba...

Na un manera kómiko e artistanan a presentá diferente situashon ku a tuma lugá durante dje aña aki...

E públiko a rekonosé kada situashon i a hari nan barika yen...

Ta pendiente pa nan siguiente presentashon...

Ayera nochi ma tuma nota di un komentario di Ike riba retnan sosial kaminda e ta bisa di ta spera ku e kornan ku tin kantantenan ku ta kanta falsu, ku pa 2019 nan lo tin un adelanto...

Ike a pone mi hari, pasó ta siman pasá ma bishitá misa i a eksperensia un kantamentu falsu ku e kantante mes a spanta ora el a sali kanta falsu...

Un felis djárason, djabièrnè nos tei bèk!...