Shonnan un bon siman pa boso...

Nos a drenta e siman di Pasku di Nasementu i kaya ta kargá ku tráfiko...

Mainta trempan, despues di Misa di Ourora kaya ta un tiki drùk, despues bo tin un tiki alivio pasó no tin skol, pero despues di 9 or di mainta ta mané tur hende a sali kas i ta riba kaya...

Basta evento e wikènt ku ta tras di lomba, áwaseru a komportá su mes tambe i mester bisa ku ta masha hopi hende mes tabatin den wikènt riba kaya...

Eventonan tabata bon bishita, entre nan nos mester hasi menshon di e komedia ‘Tisha’ ku a pèrkurá pa dos sala yen den ouditorio di WTC...

Awe nochi nan tin e último funshon, si bo no tin bo karchi ainda hasi lihé pa bo kumpra bo karchi i bai wak e obra skibi i dirigí pa Vader Volk...

Bon komentario so tin dje obra aki...

Ayera durante di rueda di prensa di Karnaval nan a invitá sra. Lucky di Curaçao Sail pa bin duna informashon riba bishita di un barku di bela ku tei pa Gran Marcha di Karnaval...

Ta resultá ku e tripulantenan dje barku ‘Juan Sebastian Elcano’ lo bai partisipá na nos Gran Marcha...

Ma komprondé ku lo tin riba 200 miembronan dje tripulashon ku lo partisipá i lo ta den e promé sekshon di Gran Marcha ku ta e sekshon di protokòl i invitadonan...

Papiando di Karnaval, ta kiko a pasa un grupo di Karnaval grandi ku den wikènt a saka un anunsio ku nan ta ‘almost Sold Out’? ...

E grupo ku tin kustumber di tin komo 10 modèl di trahe pa 2020 a konsentrá riba 4 modèl i ta resultá awor ku tela lo ta kabando, motibu pa kua a notifiká ku nan ta ‘almost Sold Out’, loke a pone miembronan ku no a bai kue midí ainda bira ‘paranoid’!...

‘Shon Lou’ buska tela pa bo por tene e hendenan trankil...

E show ayera nochi di Juni Juliet di e leyendanan di Kòrsou a bolbe atraé un bon públiko den Riffort Village...

Ayera nochi Ced Ride a duna un presentashon tur afó, un leyenda bibu di nos músika lokal...

By the way, tremendo transmishon di Televishon Direct ku a transmití e konsierto aki i duna e televidentenan un tremendo bankete musikal...

Angelitos den wikènt ku ta tras di lomba a selebrá nan 40 aña di eksistensia...

Great pa mira kon esnan ku den pasado a yega forma parti dje grupo a biaha fo’i Ulanda bin Kòrsou pa tei presente na e selebrashon huntu ku Tante Ruthie...

Pabien i ku e organisashon ku a krese sigui yuda hóbennan no solamente den nan formashon musikal pero tambe den nan formashon personal komo hende...

Nos tei move, djabièrnè nos tei bek ku e penúltimo edishon di ‘Louie Louie’...