Un bon siman pa tur nos lektornan...

Awe te ultimoooo edishon di ‘Louie Louie’ pa 2019...

Un aña no fásil pa farándula lokal...

Un aña kaminda bandanan a lucha pa por sobrebibí i kaminda nan mester tabata masha kreativo pa por logra keda kabes riba awa...

Un aña kaminda nos a mira lansamentu di bandanan ku despues no a presentá mas, esaki simplemente pe motibu ku no tin mas lugá den farándula lokal òf ku e promé impreshon ku nan a duna no tabata dje impaktante ...

Un aña kaminda nos a mira ku e situashon ekonómiko di pais a bai atras i esaki tabatin su impakto tambe den farándula lokal...

Un aña kaminda agrupashon musikal Gentz a demostrá di ta e banda mas popular na Kòrsou ...

Den e aña aki e piesa mas popular tabata ‘Ma frei bo, ba basilá ku mi’...

Un aña kaminda obranan teatral a bria ku vários obra a keda presentá riba tarima...

Den e aña aki tambe nos a tuma nota ku e sosten pa formashon musikal a baha, ounke ku tin vários organisashon ta ofresé esaki, e sosten a bira ménos ...

Edishon number 9 di Curaçao North Sea Jazz Festival a tuma lugá i ku nos ta pendiente ainda pa anunsio ofisial di fechanan pa edishon number 10...

Den e aña’ki nos a tuma nota ku tin interes pa produkshonnan sinematográfiko lokal...

Tin mas ku 1 organisashon ku aworakí ta duna sosten na produktornan lokal pa por risibí fondo pa nan proyektonan, esaki sigur ta algu di aploudí...

Un aña ku ta terminá i ku tin insertidumbre pa loke ta trata kontinuashon di ‘Kas di Kultura’ i ku meresé un aklarashon di parti di Gobièrnu di Kòrsou...

Den e aña aki un biaha mas ta resaltá e nesesidat pa sigui duna nos Kultura e atenshon ku e meresé...

E ‘Aña di Ka’i òrgel’ a resultá tremendo i nos mester sigui duna atenshon na Kultura i tur su fasetanan ku no ta solamente e muzik ...

Nos ta para dilanti 2020, pa e aña  benidero mester traha huntu pa por logra lo máksimo pa Kòrsou...

Gobièrnu di Kòrsou i Kas di Kultura mester yega na e fórmula kon pa fomentá e desaroyo di nos Kultura lokal, mester di mas proyekto pa sigui traha riba e desaroyo di nos pais kulturalmente...

Farándula lokal ta bai pasa den un tempu difísil, pero kreatividat ta bai hunga un ròl importante den esaki...

Karnaval ta djis den bògt, Fundashon JAG i AMAK tin trabou duru nan dilanti pa tantu eventonan di Karnaval i tambe Festival di Tumba resultá un éksito rotundo...

Pa ‘Louie Louie’ tabata un plaser pa durante di 2019 a laborá i produsí tantu e páginanan di ‘DEN E BEMBE’ komo ‘Louie Louie’...

Kos bon so den 2020!...