Un felis djabièrnè pa tur nos lektornan...

Un felis 2020, Kos Bon So den 2020 pa abo i bo famia...

Fin di 2019 ta tras di lomba i nos ta pendiente awor pa wak kiko 2020 ta trese kuné...

No warda wak kiko e ta trese, sali move i sòru pa abo logra tur loke bo ke logra den 2020...

Pone bo metanan i traha pa bo por logra nan...

Si nos uni, nos ta logra muchu mas, esei ta loke nos mester hasi aki na Kòrsou...

Farándula di Kòrsou den final di 2019 a konosé algun fiesta ku no a bai bon, promotornan a keda ketu, pero esnan ku ta move kaya si a tuma nota di fiesta i eventonan ku no a kana bon...

Esaki sigur mester hala atenshon di e organisadónan di evento pa nan ser kreativo i prepará nan evento bon...

2020 a kuminsá i awe e temporada di Karnaval tei kuminsá ku un jump up/ jump in organisá pa Fundashon JAG...

Pa awe nochi ta spera basta hende riba kaya pa para wak e jump up ku lo sali Waaigat i bai terminá na Stadion di SUBT...

Ta despues di basta un par di aña ku tin un jump up ku ta pasa Penstraat atrobe...

Fundashon JAG ta optimista ku tur dos evento dje wikènt aki lo kana bon i ku nan lo risibí bon sosten di pueblo di Kòrsou pa ku e eventonan aki...

Kumpra bo karchi i bai disfrutá dje apertura di Karnaval 2020 i tambe e konsierto den Carnival Village...

Nos ta pendiente pa ora siman bòltu pa AMAK tene su rueda di prensa relashoná ku Festival di Tumba 2020...

Ta interesante pa sa si e kantidat di partisipantenan na Gran Marcha lo oumentá e aña aki ku ta selebrá e di 50 aniversario...

Mi no ke konta e gruponan ku ta partisipá den e parti di protokòl, pasó nan ta invitado na e marcha...

Segun mi e kantidat di partisipante lo keda mesun kos, ta e moveshon di un grupo pa otro ta loke ta hasi e diferensia...

Festival di Tumba ta ketu pa loke ta trata promoshon di ‘Pay per View’, normalmente ya TDS a kuminsá ku promoshon...

Nos ta pendiente pa tende ta kon e parti di promoshon lo kore awor ku UTS i TDS no ta bou di mesun dak!...

Festival di Tumba ta aki 25 dia i e klientenan di kustumber ta puntrando kaba ta dikon no a duna chèns pa kumpra nan pakete ku ‘early bird’...

Manuel papia ku mi!...

Otro siman djaluna ‘Louie Louie’ ta bòltu drenta temporada di Karnaval i pa e periodo nos lo produsí diariamente dos página di Karnaval...

Felis wikènt i te djaluna ku Dios ke!...