Un bon siman pa tur nos lektornan...

Despues di a tuma algun dia di deskanso despues di Karnaval nos tei bèk...

Ban habri e siman i felisitá e pareha Isabella masha pabien...

Dj Danger a indiká bon kla ‘Loke Dios uni, niun hende no por separá’...

Problema entre promotornan...

Tin un promotor ku a bira ‘des duivels’ ora ku el a tuma nota ku un otro promotor a kontratá un artista den e mesun género kuné i ku lo ta presentando den mesun luna...

Ma komprondé ku telefòn a rin bai i ku ta basta malkontentu a keda ekspresá...

Ku e merkado di artistanan habrí i ku e diferensia entre presentashon di mesun género na un distansia di por lo mínimo dos siman ta bira difísil pa bo por stroba presentashon di otro...

Aworakí ta esun ku kue merkado ku su plan promoshonal lo ta esun ku tin mas chèns pa logra éksito...

E merkado ta habri i ta reakshon di públiko ta bai hunga un ròl...

Ayera ‘Tisha’ tabatin su último presentashon i e grupo di teatro bou di direkshon di Vader Volk por mira atras riba un eksitoso presentashon dje obra teatral aki...

Mi ta djis dòp bai bèk den Karnaval 2020 un ratu...

Ta diferente grupo a haña nan tin ku paga partisipante nan sèn bèk pasó kosedó no a logra di kaba di kose nan trahe di Karnaval...

Tin gruponan ku a keda mal pegá i no a logra...

Otronan mester a keda sinta warda te djadumingu mardugá pa por a risibí nan trahe i otronan ku ta djamars nan por a ‘bula aden’, despues di a risibí nan trahe...

E problema di e kantidat di kosedó ku por produsí na kantidat ta un problema sigur pa e gruponan grandi ku tin mas ku 500 partisipante...

Kos ta pega na kaminda i no ta keda nada otro ku duna e hendenan nan sèn bèk...

Ban spera ku e gruponan grandi por yega na un fórmula pa otro aña nan por logra di manehá e situashon aki...

Temporada di Seú tei start e siman aki ku e rueda di prensa...

Ya kaba tin interkambio di pensamentu pa loke ta trata e sitio kaminda Kantadó Mayó 2020 tin ku tuma lugá...

Tin tur indikashon ku lo e tuma lugá na Rust & Burgh, pero tin otro pensamentunan mirando ku e festival di Kantadó Mayó a demostrá na vários okashon ku e tin tur ingrediente pa sigui krese na kantidat di públiko ku lo ke asistí na e festival...

‘Louie Louie’ ta di opinion ku e evento mester bira un grátis pa pueblo por asistí i ku mester buska un sitio sentral pa organisá esaki, por ehèmpel Plasa Brion...

Gobièrnu huntu ku empresanan estatal mester duna kontribushon pa por logra realisá e evento grátis pa pueblo...

Spònsernan lo kubri e produkshon dje evento ku no ta eksigí dje tantu ei i henter e evento lo bira ‘budget neutral’...

Gruponan di Seú ta preparando, pa mañan nos lo kompartí mas di esaki den ‘DEN E BEMBE’...

Te djárason ku Dios ke!...