Un felis djárason pa nos lektornan...

Karnaval a terminá pero te ainda tin yen informashon i puitu ta saliendo for di bou di makutu...

Den e dianan aki tabatin informashon ta sirkulá di kambio di banda pa otro grupo di Karnaval...

Manera nan sa bisa na ulandes: ‘Hij heeft de klok horen luiden, maar weet niet waar de klepel hangt

’...

Nèt e banda ku nan ta papiando di dje no tei move, tin un otro banda si ku a keda aserká i te asta tabatin reunion kaminda a duna e banda un oferta...

Lo tin moveshon di banda esei ta sigur, pero tur kos ta dependé si lidernan di grupo no logra pa mantené nan banda den nan kurá...

Ayera Little Leito i Boy Thode a konfirmá e espektativa ku tin pa e presentashon di Fernandito Villalona na Kòrsou...

E siguidónan di ERA i fanátikonan di Fernandito ta pendiente pa manera karchinan subi merkado otro siman pa nan sòru di kumpra nan karchi...

Djasabra awor tin un ‘gimmick’ pa karchi general, esun ku ta ‘wise’ ta sali kumpra su karchi for di awor...

Ounke ku promé e no tabata mustra asina, ta parse ku tòg durante di 2020 aki lo tin basta presentashon internashonal...

Tin promotornan ku ta bezig ta ‘time’ si nan ta kontratá artistanan internashonal pa hasi presentashon na Kòrsou...

Fechanan pa CIFFR, e festival di sine ta konosí...

Di 21 di aprel pa 26 di aprel, e organisashon lo tin presentashon di un kantidat di pelíkula i tambe e diferente kompetenshanan pa produktornan di sine lo tuma lugá aki na Kòrsou...

Awe ta fecha pa e rueda di prensa di Fundashon Kultural Seú Kòrsou...

Awe tur detaye dje selebrashon di Seú 2020 lo keda kompartí...

Selebrashon di Dia di Rincon na Boneiru un biaha mas ta mustra di bai atraé un kantidat di yu di Kòrsou i bonerianonan for di islanan ABC...

Ya petishon pa buelonan privá a kuminsá tuma lugá debí ku praktikamente tur buelo komersial ta yen pa e fechanan...

Ma komprondé ku tin sigur un grupo di promotor ku ta pensando pa organisá un evento den e wikènt ku CNSJ lo mester a tuma lugá den 2020...

Nan pensamentu ta ku no mester laga e wikènt ei bai bashí sin nada, e pueblo a kustumbrá i nan tei traha riba dje...

Nos a drenta luna di mart i dianan ta pasando lihé...

Un kalènder di aktividat ta algu ku Ofisina di Turismo mester por krea huntu ku tur e promotornan ku ta pendiente pa produsí eventonan den e aña aki...

Den pasado a yega di bai Aruba, Sürnam i te asta Colombia segun mi pa promové e eventonan lokal...

Nos mester ta proaktivo tantu lokal komo internashonal...

Nos ta pendiente pa otro luna hotèl Corendon habri...

E kantidat di turistanan ta sigui krese i nos mester traha riba eventonan kultural/ musikal pa e turistanan asistí na esakinan...

Nos tei move, djabièrnè nos tei bèk ku mas di Louie Louie...