Un felis djabièrnè, otro fin di siman tei kuminsá...

Ensayonan pa Kantadó Mayó a kuminsá, pero e festival mes no tin sitio ainda pa esaki tuma lugá...

Durante dje rueda di prensa ku a tuma lugá, Carlos Zimmerman di FKSK a anunsiá ku instansianan di Gobièrnu a bai kontrolá i haña tantu Rust & Burgh komo Klup di Shell no apropiá pa organisá e eventonan den dje...

Awor nan tin 4 otro opshon i lo mester skohe den 1 di nan...

‘Louie Louie’ resientemente a proponé pa organisá Kantadó Mayó riba Plasa Brion, awó por organisá e Reina Seú tambe riba Plasa Brion, paso ta e djasabra promé ku Kantadó Mayó esaki lo mester tuma lugá...

Si Gobièrnu lesa, Sektor di Kultura a kumpra e dos eventonan aki serka FKSK, nan ta kubri mayoria di gastu. Nan por aserka algun dje loke ta keda yama NV-nan di Gobièrnu i pidi nan duna un sosten na FKSK pa dje forma ei e eventonan por keda organisá ku un budget neutral...

Ma tende ku tin un grupo di hende ku tin un promotor bou di lupa, ta manera e persona aki organisá un aktividat, nan lo laga shon deurwaarder bati na porta pa kobra...

Parse na vários okashon nan a aserka e promotor pa e kumpli ku e debe habri ku e tin pero esaki sea no ta kue telefòn òf te hasta ta hasi manera e no konosé su fiadó ora e topa òf krusa ku esaki durante di aktividatnan públiko...

Yen prekoushon internashonal pa loke ta traha Coronavírus den aktividatnan grandi...

Promotornan grandi ke evitá di organisá evento i ta kanselá esaki pa miedu ku e públiko ta keda sin kumpra karchi i tur nan invershon a bai pèrdí...

Tin diferente evento musikal grandi ku ya a ser kanselá...

Kompanianan sinematográfiko tambe ta pasando den pèrta, paso nan ta pèrdè di gana, debí ku a sera un kantidat di ‘movies’ i pelíkulanan ku a keda produsí i estrená no ta generando e entrada ku nan a pensa...

Bek aki na Kòrsou, gruponan di Seú a kuminsá anunsiá nan presentashon di trahe i esaki tumando lugá ku aktividat musikal pa dje forma ei rekoudá fondo ku e evento tambe...

Aworakí bo mester ta kreativo pa por logra di rekoudá fondo pa bo grupo di Seú...

Segun mi e kontribushon ku tabata risibí di FKSK tambe a baha, motibu pa kua ku bo ta mira ku gruponan ta pone nan preis pa partisipashon ya asina esnan interesá por skohe kua grupo nan ta bai...

‘Bena Mayo’ ta nòmber dje agrupashon rítmiko ku a sali for di HPA ...

E formashon musikal nobo aki lo mester imponé rèspèt durante di Kantadó Mayó, meskos ku tabata e kaso den pasado ku HPA...

Ora HPA subi tarima, ta para tur hende ta para wak ta ki desaroyo nobo nan a trese pa loke ta kompañamentu di nan kantantenan durante di e festival di Kantadó Mayó...

Nos tei move, disfrutá di bo wikènt, nos tei djaluna awor ku otro edishon di LOUIE LOUIE