Un bon siman pa tur nos lektornan…

Ambiente di Seú a kuminsá kue plasa e wikènt ku ta tras di lomba...

Diferente grupo a tene presentashon di trahe, miéntras ku inskripshon pa Kantadó Mayó tambe a tuma lugá ayera na Festival Center...

Pero promé ku esei, Grupo E he he, esun “Real” a tene nan ‘Yama Danki Party’...

Segun ‘DEN E BEMBE’ por a komprondé a surgi un ‘split’ entre Sandy i e grupo bieu di ‘Aloha’...

‘Real E he he’ tin un direktiva nobo i segun informashon ta parse ku tur hende inkluyendo spònsernan, tim di téknikonan i tambe ayudantenan den bar a djòin Sandy Atimadora pa sigui ku e grupo...

Ya a kambia e página di facebook, pero e grupo ta pendiente pa anunsiá mas kambio ...

Algu importante ta ku e spònsernan ta kere den Sandy i a dun’é sosten total pa e sigui ku e grupo...

Festival di Kantadó Mayó ta bai Festival Center, esei ta informashon ku nos a risibí ayera...

Lo bini algun adaptashon, manera lo usa e stage ku tin kustumber di usa den Klup di Shell i lo no hasi uso dje stage grandi di Festival Center...

Esaki sigur ta un notisia positivo, awor ta toka turno pa e públiko respondé i duna respaldo total na e evento ku sin duda ta atraé un públiko grandi...

Nos kolega Rilley Ignacio ta bèk komo partisipante den Kantadó Mayó...

Ultimo biaha ku Rilley a partisipá el a presentá un komposishon titulá ‘Pinda’!...

Awó Rilley ta pendiente pa presentá: ‘Bati pa Mi’...

Rilley ta partisipando huntu ku Pincho i su Grupo, ke men ya bo sa kaba ta basilon bai gol!...

Ma mira riba e lista ku tin un grupo ‘H.U.L.K.’ tambe...

Spera e músikonan no ta bira bèrdè di bèrdè durante di presentashon...

Hopi hóben partisipando, esaki sigur ta duna e selebrashon di Seú un kontinuidat pa hopi tempu...

Wikènt benidero, mihó bisa djadumingu awor tin e kompetensia di Maramentu di Lensu...

Nos a tuma nota ku tin 17 partisipante pa e kompetensia loke sigur lo hasi esaki interesante...

E konsepto nobo dje kompetensia ta trese kuné ku bo mester partisipá na e tayer, loke ta sigurá ku e partisipantenan tin un nivel promé ku nan partisipá...

Den tantu Kantadó Mayó komo Maramentu di Lensu e kompetensia ta fuerte...

E partisipantenan tin un orguyo grandi i ta kompetí pa gana!, nada kuent’i mi ta bai partisipá, no nan ta bai kompetí...

Tin algun produkshon musikal ku ta pendiente pa keda lansá den e simannan ku ta sigui...

Tin algun banda i artista den studio di grabashon i nos ta pendiente pa tende loke a keda produsí...

Nos tei move, siman a kuminsá i nos kada un mester duna nos granito pa adelanto di nos Pais, Kòrsou!...

Bon siman!...