Nos tei, siman a parti na dos aki...

Wikènt ta djis den bògt ...

Ayera nochi Grupo Azalea a presentá nan trahe pa Seú 2020 na nan miembronan i públiko...

E grupo a keda realmente satisfecho ku nan presentashon i nos por a komprondé ku nan a risibí basta inskripshon ayera despues di nan presentashon di trahe...

Apart di e trahe bunita, otro aspekto ku tambe ta hunga un ròl ta e animashon ku ta den man di ‘Bena Mayó’, ántes HPA...

E grupo bou di direkshon di Rendel Rosalia ta un kos hopi serio pa loke ta trata animashon kultural...

Nan tambe ta pèrkurá pa Azalea risibí mas miembro...

Ora ma kere ku ta den e género di merengue so lo tabatin problema pa loke ta trata fechanan di evento ta resultá awor ku den e género urbano tambe tin un kos ta kushi...

Ayera mi tabata ‘At the right place, at the right moment’...

Sea mester habri e merkado i laga kada promotor kore su rísiko ku su evento òf mester bin ku un maneho nobo ku ta transparente i ku ta duna promotornan un protekshon i òf ta duna nan mas chèns di tin éksito ku nan evento sin tin kompetensia di promotornan ku ta organisando eventonan ku artistanan di mesun género...

Loke si no mester aseptá ta promotornan ku lo bai organisá evento kaminda tin un artista prinsipal di un género i huntu kuné tin artistanan invitá di otro género ku e or’ei ta blòkia mas ku 1 género ku su evento ku e ta organisá...

Nos no por baila Wals ku Hip Hop pareu, ban serio !...

Manera nos a indiká, Kantadó Mayó ta tuma lugá den Festival Center...

Awe ta fecha pa entrega di letra, segun e komishon por hasi esaki digital, via dje e-mail ku e organisashon a pone disponibel pa esaki...

Ensayonan di gruponan rítmiko ta sigui i mester bisa ku na diferente sede di ensayo esaki ta tuma lugá den presensia di fanátikonan ku ta bin sinta pa kuminsá kai den e ambiente dje seúnan ku ta keda ensayá pa dje forma ei dia di presentashon nan por animá nan grupo ...

Kompetensia di Maramentu di Lensu lo konta ku 12 partisipante manera nos por a komprondé...

E evento ta tuma lugá djadumingu awor na Hòfi Fidel ku a resultá un sitio perfekto pa e kompetensia aki...

Animashon musikal durante dje kompetensia ta na enkargo di Sembra Alegria, Sablika, Hóben na Timon i Den Chiki...

Pues ambiente durante dje evento lo ta sigurá!...

Shonnan tabata un plaser pa bolbe produsí un edishon di ‘Louie Louie’...

Te djabièrnè ku Dios ke!