Un felis djabièrnè pa tur nos lektornan...

Abrenunsia, tin hende ku gusta papia i no ta stòp di papia tampoko...

E wikènt aki tin basta moveshon, tantu fiesta komo aktividatnan manera ‘Strongest Man Competition’ ku ta e kompetensia di forsa ku lo tuma lugá djasabra riba Brionplein i djadumingu na Madero, Mambo Beach Boulevard...

Awe amantenan di serbes ta nan dia, awe ta ‘Lions Beer Fest’ na Lanthuis Klein Kwartier, sede di Curaçao Lions Club...

Segun ma komprondé bo ta drenta i risibí bo ‘beer mug’ i ku esaki bo ta bebe serbes bai gol durante 3 ora largu...

Tin un bar ku ta sirbi otro bibidanan tambe, esaki spesialmente pa esnan ku no ta amante di serbes pero ku tòg ke bishitá e evento...

‘Tin Tan Destroyer’ ta estrená e wikènt aki den Teatro Luna Blou...

Kumpra bo karchi i bai hari i baha stress durante un dje tres presentashonnan ku tin e wikènt aki dje obra humorístiko skibi i dirigí pa Percy ‘Boskwiri’ Benita...

Mañan anochi ta UFC, Urban Festival na Kleine Werf...

Fanátikonan di músika Urban lo por disfrutá di un anochi ku presentashon di diferente dj i artistanan invitá spesialmente pa e evento...

Pa e amantenan di músika di kòmbèk i montuno, djadumingu awó e selebrashon di ‘Primintí mi’ ta sigui na Lapalapa Papito na Roi Santu...

Ephrem J ta pendiente pa hasi un presentashon na Barcelona, Spaña...

Nos bachatero internashonal ta sigui konkistá merkado, esaki no opstante ku e aña aki e no a produsí masha...

Cizzle a pone un deklarashon riba facebook kaminda e ta anunsiá ku e ta retirá un ratu for di farándula pa e por kaba di logra su metanan ku e tin den bida...

Su retiro a bira konosí despues ku ONE, e banda ku e tabata forma parti di dje a hasi un bishita na skol i Cizzle no tabata presente...

Por sierto ONE, a ‘lay low’ un ratu i ta e bishita di skol a pone ku e banda a kuminsá move atrobe...

Great pa a tuma nota di e festival di karaoke ku a organisá pa grandinan...

E tipo di aktividatnan aki ta nesesario pa tene e grandinan den moveshon...

Ora bo bira grandi no ta nifiká ku mester hinka bu den un kas di kuido anto laga bu bai warda bo morto...

E grupo di aguinaldo Cariñitos ta pendiente pa nan selebrashon di 30 aniversario...

22 di òktober ta fecha riba kua lo tin presentashon di trahe di Karnaval 2018 di Grupo Aloha...

Keda pendiente pa mas informashon riba e presentashon aki...

Bon tabata un plaser, wikènt ta kargá ku aktividat...

Nos ta topa!.