LOUIE LOUIE

Un bon siman pa tur nos lektornan...
Kon a bai ke wikènt?

Ma move tantu djabièrnè komo djadumingu un ratu riba kaya i mester bisa ku e situashon ta di atenshon pa loke ta trata aglomerashon di hende na sierto sitionan popular na Kòrsou...

E kantidat di hende riba kaya ta dal un beter ta na nivel apnormal segun mi...

E kustumber na sierto dje sitionan aki segun mi ta riba stail di yena bai gol tanten outoridat no yega pa kontrolá...

Segun mi e pensamentu ta:
Kontal mi bende i saka probecho finansiero dje situashon mi no tin niun problema...

Grupo di Karnaval ‘Eh he he’ a manda un mensahe rònt pa informá ofisialmente ku nan a kandela nan fiesta ku mester a tuma lugá dia 3 di òktober próksimo, pero ta pendiente pa manera esaki ta posibel pa anunsiá un fecha nobo...

Turesten nan ta pidi tur hende pa kuida kurpa, protehá abo i bo sernan kerí...

E pueblo di Kòrsou definitivamente a skohe pa ‘staycation’ aki na Kòrsou...

Bo tuma nota kuantu empresa ta duna oferta di entre otro estadia i bo mira e reakshon ku nan ta risibí, ta di aploudí kon e pueblo tòg a duna oido i sostené nos empresanan lokal...

Nos a kombersá ku Rignald Maduro, e bosero dje komishon di farándula i el a indiká ku e komishon no a entrega su proposishon na Minister Steven Martina, esaki tumando na konsiderashon ku 2 siman pasá Gobièrnu a tuma e desishon pa bin ku ‘Toke de keda’...

Ta pendiente pa e siman aki tende kiko ta e siguiente paso ku Gobièrnu ta bai tuma pa dje forma ei huntu ku Minister Martina plania ki ta e siguiente paso ku ta bai tuma...

E komishon ta pendiente riba e desishon e siman aki pa sigui ku nan plan pa reaktivá farándula di Kòrsou...

Mas i mas profeshonalnan den siensia di Medisina ta biniendo ku pensamentunan kontra di tur e medidanan ku Gobièrnunan di diferente paisnan ta tumando riba rekomendashon di organisashonnan di salubridat mundial...

E situashon aki ta kreando un desbalanse i ta pone ku tin mas krítika riba maneho di Gobièrnu pa ku e pandemia di Corona vírus...

Ma tuma nota ku e produkshon ‘Moru Bondia’ di Boechi, Trop i Grif a surpasá 1.2 mion di views riba YouTube...

E kansion ku na momentu ku el a keda lansa tabatin basta komentario riba parti dje letra “ Frishidel bashi manera kurason di mi Mama” a resultá di ta un kansion ku hopi a bai buska drechi pa wak e videoclip i skucha kontenido dje kansion pa komprondé e mensahe ku e kompositor kier a trese dilanti...

‘Louie Louie’ a yega su final pa awe, djárason nos tei bèk ku otro edishon...

Kòrda kuida i bai trankil...

Siman a habri, ban produsí pa hiba Kòrsou dilanti, nos tur huntu ku nanishi den mesun direkshon pa un Kòrsou próspero...