Un felis djabièrnè pa nos lektornan...

Nos a yega otro wikènt i despues di sigui e presentashon di Gobièrnu den e rueda di prensa ku a tuma lugá ántayera, nos mester sinta warda 1 siman mas pa nos tende si lo suavisá e medidanan...

Turesten músikonan entre otro mester sigui den lucha pa sobrebibí, pasó sin presentashon no tin entrada...

No ta nan so ta den e lucha aki, pero huntu ku nan tin diferente otro okupashon ku ta direktamente embolbí den e sektor di farándula...

Ma tuma nota ku nan República Dominicana e kantante Eddy Herrera tin un serie di presentashon ku lo ta virtual den luna di desèmber...

Esakinan ta keda hasí despues ku e kantante i su orkesta a keda kontratá pa empresanan privá ku ke selebrá e fin di aña pero den un manera virtual...

Ta kos pa pensa riba dje...

Siman di Kultura ta otro tema ku a risibí basta komentario e siman aki...

No tabatin e selebrashon kustumbrá...

Algun medio di komunikashon a pone un tiki mas atenshon na nos piesanan krioyo, pero mas ku esei no tabatin...

Riba kaya si ma tuma nota di algun bendedó ambulante ku tabata ofresé kosnan di boka dushi na benta...

E echo ku tin e situashon ku a disolvé Kas di Kultura i ta pendiente pa lanta un organisashon nobo pa atendé ku e Kultura di nos Pais ta pone ku no tabatin nada prepará ...

Ta di lamento esaki, pasó e sektor di Kultura por a prepará sikiera un òf mas evento virtual kaminda lo por a presentá eventonan musikal ku den pasado a keda produsí, pa laga e públiko ku ta na kas disfrutá di nos músika i kustumbernan krioyo...

Te hasta den krísis bo mester ta kreativo pa por pèrkurá pa e pueblo por tin algu di distraishon...

Ora bo sinta i analisá, e spin off ekonómiko ku e sektor di farándula i kultura ta sòru pe ta un basta grandi...

Ta pa hopi hende e situashon ta wanta e aña aki...

Nos por kuminsá menshoná diferente profeshon ku debí na e krísis e hendenan no ta logra produsí entrada pa nan por mantené nan mes...

Nos ta keda kere ku lo yega un kaminda ku lo mester tuma un desishon pa sigui ku e bida den e normal nobo i laga sierto aktividatnan bolbe tuma lugá...

Adaptá nos lo tin ku adaptá, pero mester por brinda oportunidat pa sierto presentashonnan por tuma lugá...

Ban spera ku e karta ku e komishon di farándula (AMAK) a manda pa mandatarionan lo por tin su efekto positivo i esaki sòru pa sikiera e porta por wòrdu habrí na un kir ...

Pa e wikènt aki nos ta deseá pa bo keda kòrda riba e medidanan di prekoushon i protehá bo mes i bo famia...

Disfrutá di bo wikènt!...