Un bon siman pa nos lektornan...

AMAK a bira furioso despues di a tuma nota di kuantu situashon tin ku ta di atenshon pa loke ta trata farándula di Kòrsou i Horeca lokal...

E ultimatum ta pa djárason awor i AMAK ta pendiente pa risibí un reakshon di Gobièrnu...

Awor Gobièrnu di su banda ta mantené e medidanan pa sigur te fin di luna awor, ke men tin un impase...

Ban wak si Gobièrnu ta keda para riba nan punto i notifiká AMAK di nan posishon pa mas tardá djárason awor...

Loke si pa ami ta importante ta un dicho na spañó: ‘Soldado atvertido no muere en guerra’...

E palabranan den e komunikado di AMAK ta papia palabra kla, nan ta kla pa bai akshon i ta spera un kontesta satisfaktorio di Gobièrnu...

Na algun okashon ‘LOUIE LOUIE’ a skibi kaba dje situashon ku músikonan i demas personal di Horeca ta pasando aden aki na Kòrsou...

Adaptashon dje medidanan ta na su lugá i si den pasado a informá ku lo mester kustumbrá pa biba ku e situashon, esaki lo ta un punto masha importante...

Tur e partidonan embolbí tin nan idea i pensamentunan kon mester atendé e situashon...

Ta kestion di sinta na mesa i deliberá riba e puntonan aki...

Di parti di Gobièrnu tambe ta importante pa tin oido na e mundu di Horeca i Farándula lokal...

Ami no ta kere ku direktamente bo por habri tur kos, pero tin espasio pa adaptashon na e medidanan ku tin aworakí...

Mi pensamentu sigur ta bai na ‘entertainment music’ den establesimentunan kaminda esaki ta posibel...

Duna nan un chèns pa kuminsá i despues ta evaluá pa sigui amplia...

Pa un proyekto ku mi ta pendiente pa lansa mi a organisá ayera ‘Louie Louie’s Bbq Party’, for di aki un gradisimentu na tur ku a duna sosten pa e evento pa rekoudá fondo por a resultá un éksito...

Meskos ku nos tin diferente otro ku tambe ta organisá evento pa rekoudá fondo...

Ayera mes durante di nos evento e kombersashon a bai riba e punto aki i nos a keda konfrontá ku e situashon ku trahadónan di empresanan kaminda a baha salario mes ta organisando eventonan pa rekoudá fondo pa nan por gana algu pa yena e bashí ku a surgi ku bahamentu di salario...

Tantu empresanan grandi komo empresanan mas chikí ta konfrontando problema i ta hala faha mara, pero ta dunando e trahadónan chèns pa organisá eventonan kaminda nan por rekoudá fondo pa sostené nan mes...

Djis paga tinu riba retnan sosial i bo ta tuma nota di eventonan ku normalmente no tabata keda organisá pa empresanan pero ku awor si nan ta hasiendo esaki, pasó bo mester ta kreativo pa por logra mas entrada...

Muzik produsí pa artistanan lokal ta zona den show di moda internashonal...

Pabien tambe na e elenko i tim di produkshon di ‘Bulado; ku a logra un ‘Gouden Kalf’ na Hulanda...

Ta keda demostrá ku nos tin talentonan lokal ku riba nivel internashonal ta sigui impreshoná i logra éksito...

Bon siman!...