Un felis djabièrnè pa tur nos lektornan...

Awe ta fecha ku e Komishon na Interes di Farándula lo bai tende di Gobièrnu kiko ta su pensamentu riba e proposishon ku a keda entregá...

Awe tardi mitar di 4 lo tin un reunion na MEO na Parera kaminda lo duna informashon riba e desishon di Gobièrnu...

Ban spera ku lo por sikiera kuminsá na un forma ordená ku presentashon musikal di nos artistanan lokal...

E formashonnan musikal chikí kaminda ta toka por ehèmpel Jazz i òf djis entretené lo mester haña un dispensashon pa kuminsá presentá...

Ban wak si ‘Opperbevelhebber’ tin Farándula i Kultura na kurason...

Monica Mao Cheia ta djòin Extatic di Aruba pa interpretá ‘Relax’, piesa komponé pa Roshdrums i areglá pa JF, John Francis, dos hóben talentoso...

Great pa tuma nota ku artistanan dje islanan ABC ta djòin ku otro pa produsí muzik pa tene nos kontentu...

Ma lesa for di riba página di facebook di Gregory Colina un artíkulo ‘The Powerfull Effect of Music on the Brain’...

E keda sientifíkamente aprobá ku muzik tin un efekto spesial riba e funshonamentu di e mente...

Muzik ta baha doló, baha stress, yuda bo memoria i stimulá e mente...

Un artíkulo interesante kaminda un biaha mas ta resaltá e efekto positivo di músika...

Ir Sais ta un artista ku a pèrkurá pa e kontesta ku e personanan korekto pa e subi e tarima internashonal ku su produkshonnan...

Su éksito ‘Dreamgirl’ a keda remix na dos vershon kaba i ámbos a logra surpasá miónes di views i esun ku ta keda lansá awe ta subi dos merkado ku sigur lo ta interesante pa Ir Sais...

Bon konekshon ta e yabi di éksito ...

‘DEN E BEMBE’ a kombersá ku QD Navarro ku ta e produktor di tur e último videoclipnan di Ir Sais...

QD ta sumamente kontentu ku e oportunidatnan ku e tambe ta haña pa subi e plataforma internashonal ku su produkshonnan...

Fin di aña ta yegando i ya tin algun emisora ku a kuminsá toka piesanan di fin di aña, sigur gaita krioyo i aguinaldo...

Ban spera ku e komportashon di públiko lo sòru pa ora nos drenta Novèmber i Desèmber ku e situashon di Corona lo ta mas dominá pa dje forma ei nos por kuminsá disfrutá di algu mas dje ambiente di fin di aña...

E pueblo ta sperando e temporada di fin di aña pa nan tin algu pa nan baha stress i disfrutá dje kambio di aña, pero na mes momentu bo mester ta konsiente ku kosnan a kambia i mester kuida...

Importante ta pa nos mantené nos kustumbernan kultural pa no pèrdè nos identidat ...

Pa esaki radioemisoranan ta hunga un ròl importante...

Ta nan ta pèrkurá pa e muzik zona pa hinka nos den ambiente...

Nos artistanan ku ta produsí músika kultural, sigur tambú den e parti final di 2020 aki tambe lo laga tende di nan...

Tin sufisiente tema pa skohe i ban wak ta kua tambú lo bira esun mas popular...

Disfrutá di bo wikènt, djaluna nos tei bèk !...