Un bon siman pa tur nos lektornan...

Awe ta djis dòp na trabou, traha bo 8 oranan i bai disfrutá mañan di un dia liber, esaki dado kaso bo ta traha orario di kantor, pa esnan ku ta traha warda, e ta djis un dia mas di trabou...

Basta moveshon durante di wikènt ku aktividatnan pa diferente smak...

Mi ta siguiendo weganan di futbòl pa mundial 2018 i mi mester remarká ku si Ulanda no logra klasifiká ku e mundial lo pone ku komersio aki na Kòrsou sigur lo drei slou...

Ta konosí ku mayoria di establesimentunan aki na Kòrsou ta pone aktividat na momentu ku tin e partidonan ku Ulanda ta hunga i ta logra atraé masha hopi fanátiko, awor si Ulanda kai afó, kos tei kana slou...

Den pasado ora ku Ulanda a keda eliminá, un konosido importador di serbes a splika ku pa nan tambe mundial a kaba, debí ku e benta di serbes ta baha mesora...

Un efekto mas riba ekonomia lokal ...

Tin un banda ku ainda ta pasando den momentunan difísil, tin un malkontentu ta reina i e banda no ta logrando pa yena su agènda ku presentashon...

Si bo wak bon fiestanan ku bandanan popular ta drai dor di 2 pa 3 banda...

Sobrá ta presentá si, pero esaki ta tuma lugá na kamindanan ku bo no mester paga pa entrada...

E konsepto di ‘entertainment band’ grátis na un sentro nokturno a bira manera algu normal pa sierto bandanan...

Si bo no move, bo banda ta keda para i e merkado no ta duna pa bin un kambio pronto den esaki...

E echo ku tin un sirkuito será pa loke ta trata presentashon di banda i esaki kombiná ku e echo ku e otro bandanan no ta logrando di penetrá tampoko ku éksito na radio ta pone ku farándula ta praktikamente stanká pa loke ta trata kombinashon di bandanan pa fiesta...

Niun no ta duna otro chèns i tin algun ku ta para wak, sin por hasi nada...

Nos ta yegando mitar di òktober i ainda no tin un solushon pa loke ta trata Festival di Tumba 2018...

‘Louie Louie’ a komprondé ku tin un grupo ku ta trahando riba e posibilidat pa tuma e produkshon i organisashon dje festival over for di AMAK...

E grupo aki parse ta e úniko solushon faktibel pa e festival debí ku un dje spònsernan mayó dje aktividat a indiká for di despues di temporada di Karnaval ku lo e no bin bèk komo spònser, ni tampoko komo produktor dje evento...

AMAK lo keda komo e organisadó dje festival, pero tur sobrá desishon i organisashon dje evento lo ta den man di e grupo di promotor...

Ban wak si lo logra yega na solushon pa e kaso aki...

Tabata un plaser pa kompañá bu, te un otro edishon di ‘Louie Louie’...