Un felis djabièrnè pa tur nos lektornan...
Mi a gosa kon e músikonan a tene nan manifestashon pasífiko...

Mi tin djis 2 punto ku mi kier a trese dilanti pa loke ta trata e manifestashon aki...

Na mi opinion, e idea di un manifestashon tabata bon, pero mester a hasi esaki den dia i kombiná esaki ku entrega di un karta na Promé Minister kaminda ta bolbe enfatisá riba e importansia pa duna Farándula un chèns pa kuminsá i bou di kondishon...

E echo ku AMAK su komishon di Farándula ta hasiendo nan máksimo esfuerso ta bon, pero e no tin niun preshon kuné...

Ta importante tambe pa por logra atraé mas músiko ku solamente e grupo ku a manifestá...

E kantidat ta representativo, pero kaminda a tene e manifestashon no tin niun tiki influensia riba e mensahe ku e grupo ke trese...

Ora bo risibí kobertura di prensa e ta hala atenshon, pero despues ku e potrètnan sali den korant i e manifestashon pasa na televishon, tur hende ta bai bèk na òrdu di dia...

Un biaha mas mi ta enfatisá ku mi ta aploudí e inisiativa, pero segun mi pa e por tabatin mas impakto mester a yega serka Gobièrnu pa manifestá e preokupashon di e grupo...

Nos ta bolbe yega otro wikènt i no tin kambio pa loke ta trata toke de keda...

E ta keda bálido te ku dia 30 di òktober, pues 1 siman mas pa bai...

Pareu ku esaki bo mester tene na konsiderashon ku e kantidat di kasonan positivo mester baha i rekuperashon dje grupo ku aktualmente ta positivo tambe mester baha pa por tin un apertura serka Gobièrnu pa por permití un apertura di Farándula bou di kondishon...

E di dos punto relashoná ku e manifestashon mester tabata un invitashon pa AMAK tambe a partisipá na esaki...

Esnan ku a organisá e manifestashon mester a pidi AMAK djòin nan...

‘United we stand, divided we fall’...

Huntu ta logra muchu mas i pa AMAK tambe lo tabata importante pa djòin e manifestashon pa por mustra Gobièrnu ku e grupo ta uni i tin nan preokupashon pa ku e situashon...

Loke mi por komprondé pa AMAK ta e echo ku nan ta na mesa ku Gobièrnu i lo no ke tene un manifestashon, pero si nan a keda invitá, mester a djòin pa mustra unidat...

Awe ‘DEN E BEMBE’ tin 3 kansion ku ta keda lansa...

Esaki un biaha mas ta e indikashon ku nos produktornan musikal ta sigui traha pa produsí músika pa entretené e públiko...

Clifton End a saka awe ‘Kandela’ i ta pendiente pa bolbe produsí un piesa mas ku Buleria ‘Top Secret’ ta título dje komposishon aki ku lo ta un kolaborashon huntu ku e kantante Buddy di Buleria...

Bon nos tei move, wikènt a kuminsá, kuida kurpa i deskansá...

Ban spera ku pa otro siman nos lo tin un kontesta positivo pa loke ta trata farándula...

Felis Wikènt!...