Bon dia!...

11 t’esun, spera ku lo bo tin un tremendo dia awe...

Ma komprondé ku Union di Artista a keda pa reuní...

Parse ku tin algun miembro dje organisashon ku ta konsiderá ku e akuerdo ku a yega ku Gobièrnu ta un suak, pasó por a logra mas den e promé etapa...

‘Louie Louie’ ta komprondé i ta di akuerdo tumando na konsiderashon ku kualke entertainment band ta surpasá 4 músiko i 1 tékniko...

Awor lo mester warda te ora bolbe evaluá pa por amplia e kantidat di músiko...

Mester spera ku e kantidat di kontagio di COVID ta keda stabil i ku e fuentenan no tin nada di aber ku aktividatnan di farándula...

Gruponan di Tambú i Aguinaldo/ Gaita tambe ta para den ‘startblok’ pa tende ki dia i kon por presentá...

Gruponan di komedia tambe ta sintá ta warda pa tende ta ki dia por start...

Miéntras tantu e kompania Pfizer, e mesun hendenan ku ta produsí ‘viagra’ a indiká ku nan bakuna kontra di COVID pa 90% ta eliminá e vírus. Ban spera ku lo e por yuda esnan ku ta keda infektá ...

No tin fecha ainda ku lo e ta disponibel mundialmente...

Nos artistanan lokal, manera ma skibi den e edishon di djaluna último a bria ku nan presentashon den ‘Rei e Preis’, e proyekto di Juni Juliet i kompania...

Loke si nos no a kustumbrá kuné ainda ta kanta i presentá un show pa televishon...

E interakshon ku kámara no tei serka algun dje kantantenan...

Bo ta mira ku falta un show di farándula na televishon ku presentashon di artistanan lokal...

E show di wikènt último tabata tremendo, na Aruba tambe nan tin sigur 2 siman ku ta produsí un show ku presentashon di bandanan lokal di Aruba...

Keda pendiente pa e ‘Louie Louie Talks’ di djaweps awor...

Nos lo tin un invitado ku sigur pa loke ta trata farándula lo hala atenshon pa e kombersashon ku nos lo hiba kuné...

E biaha aki nos lo dun’é chèns pa e por duna su splikashon mas amplio posibel pa dje forma ei tur hende komprondé unda e ta para pa loke ta trata farándula lokal...

Keda pendiente, mañan nos ta anunsiá ken ta nos invitado i anochi 7 or bo tin un sita ku korant EXTRA riba su plataforma digital pa sigui otro edishon di ‘Louie Louie Talks’...

Farándula ta hunga un ròl importante ora nos ta papia di ban pone ekonomia di Kòrsou move, ta hopi ta esnan ku ta dependé di farándula pa nan empresa move...

No ta solamente e músikonan, pero masha hopi empresa, negoshi di paña ets., ets. ku ta pendiente pa mas aktividat di farándula por tuma lugá...

Djabièrnè nos tei bèk, ta pendiente pa mañan anochi ‘Louie Louie Talks’, no ta ko’i pèrdè...