Un bon siman pa tur nos lektornan...

E siman di fakansi ta tras di lomba, awe skol ta kuminsá bèk i mayornan tambe ta bèk na trabou...

E organisashon di Regatta Boneiru por ta kontentu ku e asistensia di yunan di Kòrsou ku a bishitá Boneiru durante dje siman ku ta tras di lomba...

Hopi hende a bai Boneiru pa por a disfrutá dje diferente konsiertonan ku a tuma lugá relashoná ku e aktividat anual di Regatta...

Pa e último añanan e organisashon di Hype Events ta e organisadó di e aktividat di Regatta i nan a sa di kombertí e evento den un ku tin tur ingrediente pa atraé turista pa e isla...

Esaki ta importante pa e desaroyo turístiko i promoshon dje isla pa un dje eventonan prinsipal ku mester ta e kompetensia durante dje siman di Regatta...

Aki na Kòrsou e situashon di AMAK, IpFM i Curaçao Festival Center tabata den notisia pa inkumplimentu fiskal...

‘Louie Louie’ a hasi menshon dje situashon di apoyo na e proyekto di formashon musikal algun siman atras i awor bo ta mira ku e mesun proyekto ta bin resultá den notisia paso no por kumpli ku pagonan...

Ta di lamentá ku esaki ta sosodé mirando e meta prinsipal ku e proyekto tin ku ta e formashon musikal di nos hóbennan, pero ku e proyekto no ta risibí e sosten di komunidat...

Kor Sta. Famia a terminá ku su presentashonnan na Ulanda i nan por mira atras riba un tour eksitoso...

Hermanito i su Kanal 80 ta pendiente pa presentá un reportahe dje tour...

E promé wikènt di novèmber ta bai bira un kaminda lo tin sinku aktividat ku ta ser konsiderá grandi riba mesun dia...

Xcapefest Comedy Show ta tuma lugá riba 4 di novèmber...

Meskos te kaso ku e tradishonal ‘Corks & Forks’ na Lanthuis Brakkeput Mei Mei...

Na Madero lo tin ‘Oktoberfest’, un aktividat kaminda bebementu di serbes lo ta na òrdu di dia...

‘Kosechá Kultural, un evento kultural ku lo tin presentashon di artistanan lokal di tur 6 isla di eks Antia...

Kada un dje eventonan aki ta un atrakshon riba nan mes, anto esaki sin lubidá e konsierto di Ozuna i Plan B...

Tur riba mesun dia, ta kon ta hasi bai òf skohe kua si i kua no...

Mi ta komprondé ku kada un tin un tipo di públiko ku nan ta atraé, pero tin diferente di nan ku ta atraé mesun públiko...

Un pronto rekuperashon ta bai pa Farley Lourens kende ayera a selebrá su kumpleaño, pero manera nos por a komprondé a bira malu i mester a keda trasladá pa hospital...

Ilan Chester ta na kaminda pa Kòrsou. Pa mañan nos lo kompartí mas informashon riba e evento aki...

Na final dje ‘Louie Louie’ di awe, ban sigui produsí pa adelanto di nos pais...

Te djárason ku Dios ke!...