LOUIE LOUIE

Un felis djabièrnè pa tur nos lektornan...

Danki pa e tremendo reakshon riba e di dos episodio di ‘Louie Louie Talks’...

E kombersashon ku Feco Gomes a kana di un forma ameno...

Bo mes sa, subi riba facebook extracuracao i wak Louie Louie Talks ku Feco Gomes, like, share i duna bo komentario...

Pa otro siman nos ta pendiente pa otro kombersashon interesante ...

Pa otro siman nos tin un dama komo invitado i meskos ku tabata e kaso di ayera nochi e tema ku lo atendé lo ta un di interes general ...

Keda pendiente...

Feco ayera tabata masha preokupá pa e kantidat di kasonan di COVID no subi pa dje forma ei e siguiente evaluashon lo por sali positivo pa farándula i amplia e posibilidatnan...

E echo ku a informá ku un dje ‘klusternan’ ta presis di un evento di Halloween ku a tuma lugá resientemente ta trese duda den e posibilidatnan...

Feco su plan pa Festival di Tumba ta mustra interesante...

Nos no por sigui duna mas informashon dje entrevista, wak e pa bo mes tuma nota dje pensamentu di Feco riba esaki...

Kon a para ku Tambú i Aguinaldo, tei buska e manera ku presentashonnan musikal por tuma lugá?...

Ma komprondé ku ‘Suggar’ ta kla ku nan plan di distansia sosial i ta wardando e oportunidat pa nan por habri pa brinda nan públiko e ambiente kustumbrá ku presentashon di bandanan lokal...

Tin otro sitionan tambe ku tin nan plan traha sigur pa luna di desèmber i nan tambe ta sinta ku dede krusa pa wak si e chèns tei pa nan por organisá nan aktividatnan...

Na Boneiru e Gobièrnu a anunsiá ku tur presentashon musikal a keda kanselá anto pa 2020...

Ta kestion di warda aña bòltu pa wak kiko te sosodé...

Na Aruba tin reklamo ku kon por ta ku Aruba tin ménos kaso aktivo ku Kòrsou, pero tòg nan ta keda den kódigo oraño pa Hulanda...

Djadumingu awor Coridja Stars Production ta organisando e parada di Kampeon deportivo...

E tres ekiponan Scherpenheuvel di futbòl, Sta. Rosa Indians di beisbòl i Watakeli, vòlibòl maskulino lo tin nan parada di Kampeon djadumingu awor kuminsá pa 4 or di atardi...

Awaseru e dianan aki anochi ta pèrkurá pa un klima masha dushi mes...

Wer ta fresku i Kòrsou ta bira bèrdè mesora...

E wikènt aki bo por bolbe wak e komedia dje 2 karniseronan ku a bira siruhano...

Lau ku Mando tei pèrkurá pa bo hari bo barika yen, chek e informashon kon pa kumpra bo karchi virtual den e artíkulo ...

Laga mi deseá bo un wikènt plasentero, kòrda riba e mantenshon di distansia sosial i ban huntu pèrkurá pa e kantidat di kasonan aktivo baha p’asina nos por disfrutá di un desèmber manera nos a kustumbrá di dje, pero den e normal nobo...

Felis wikènt!...