Un felis djárason pa tur nos lektornan...

Ma tende di un ‘vrum vrum’ ei ku tin bista riba algun artista i promotornan pa ku aktividatnan pa fin di aña...

Nan ta manera e tumba di Djuric... ‘Wowo riba bo’...

E konsepto di ‘Big Band’ lo keda presentá na algun okashon mas promé ku fin di aña...

Randal Corsen i Axel Pikero lo ta esnan ku lo dirigí e bandanan aki...

Randal manera ta konosí lo presentá durante dje aktividat na Lanthùis Chobolobo, miéntras ku Axel lo presentá ku su orkesta durante dje selebrashon di 55 aniversario di ACU...

Espektativa ta pa wak ken ta e kantantenan ku lo presentá ku ámbos orkesta...

Nos ta yegando e wikènt di ‘One for the Road’ di Survival...

Djasabra awor e fiesta tan spera di Survival lo tuma lugá den sala di WTC...

E anunsio di Ilan Chester den konsierto a hala atenshon i mesora e organisashon a risibí reakshonnan positivo...

Fanátikonan di Yankees i Dodgers aki na Kòrsou ta mama gai di otro ku Dios di ta basta...

Awor ku ámbos team ta ganando ta pone ku nan a kuminsá ilushoná nan mes kaba ku un ‘World Series’ entre e dos ekiponan...

Mirando e wega di Dodgers, bo ta nota kara dje hungadónan di Cubs ta kambia ora Kenley Jansen wòrdu yamá ...

Tur aspirashon ku bo tabatin a bai pèrdí ora ku Kenley yega...

Kenley ta bolbe poncha dos bateadó i laga 1 lanta fly den kuadro...

Nos ta pendiente tambe pa ‘Marcha Kultural’ ku lo hunga dia 29 di òktober próksimo...

E proyekto di Shurendi Pieternella kaminda Marcha di Seú ta topa ku Karnaval...

Awe nos ta presentá e trahe di Grupo Bliss pa Karnaval 2018...

ERA lo ta e banda ku ta kompaña e grupo den Karnaval 2018...

Bliss huntu ku Aloha ta kompartí ERA 1 i ERA 2...

Papiando di Karnaval, na Aruba nan tabatin un proposishon ku a subi riba mesa pa organisá tur e elekshonnan pa Karnaval den 2017 mes i laga aktividatnan musikal pa e kalènder di 2018...

Dje forma aki esnan ku a proponé e plan aki kier a kita preshon for di e temporada di Karnaval kòrtiku di 2018...

Bon pa nos tabata un plaser di por a kompañá bu ku otro edishon di ‘Louie Louie’...

Djabièrnè nos tei bèk !...