Un felis djárason pa nos lektornan...

Siman a parti na dos aki...

Radionan a kuminsá toka tumba i pone tur hende aribabou...

Ayera nochi ma te asta tuma nota di esnan ku ta sinti falta di bai Aruba pa Fakkel...

Aworakí ta di toka e piesanan pa nos keda ke ambiente sin por selebrá Karnaval manera a spera...

Tumba ta pone e hende distraí su mente un ratu for dje situashon aktual di medidanan relashoná ku COVID-19...

Un pronto rekuperashon ta bai pa Jorgel Seferina ku ta sufriendo kebrante di salú i ta den tratamentu ...

E inisiativa di Radio Mas pa hasi un kadena di orashon ta algu sigur di aploudí...

Hopi te músikonan ku a manda nan apoyo i orashon pa Jorgel, algu impreshonante pa un animadó di radio ku a sa di sostené músikonan kada biaha ku nan a lansa un produkshon nobo...

Pa su koleganan di radio Jorgel tabata i ta un amigu ku semper ta duna atenshon i ta habrí pa duna su aporte na proyekto di otronan...

‘Louie Louie’ konosé Jorgel for di Radio Tropical kaminda Jorgel a kuminsá laborá...

Huntu ku dj Renzo, dfm nan a forma un ‘tag team’ ku masha hopi siguidó tantu na radio komo durante fiestanan...

Pronto rekuperashon Jorgel. Nos ta spera ku pronto lo bo por ta na kas pa kaba di rekuperá satisfaktoriamente...

Nos ta pendiente pa djaluna awor, esta dia 11 nos tende di Gobièrnu si lo baha un ko afó dje medidanan...

Mas i mas te empresanan ku ta pasando den mal momentu i ta den un situashon di krísis...

Pa mayan djaweps den e promé edishon di ‘Louie Louie Talks’ pa 2021 nos lo tin sra. Chantall Faneyte Regales komo invitado...

Un profeshonal den trabou sosial ku nos lo kombersá kuné riba e motivashon pa un persona ta positivo...

Djaweps awor pa 7 or di anochi nos tin un sita riba e página di facebook i di YouTube di EXTRA ku ta extracuracao pa otro edishon di ‘Louie Louie Talks’...

Farándula di Kòrsou lo mester di un ‘start up’ kompletu...

Lo mester evaluá tur kos di nobo, kuminsando for di preis di bandanan, promoshon, sitio di evento etc. etc.

Aworakí e animashon musikal den format chikí ta esun ku meresé un chèns pa por kuminsá presentá atrobe...

Tantu na Aruba komo Boneiru nan a konosé un oumento dje kasonan aktivo durante dje último dianan...

En bèrdat no mester ‘slek’ lihé, pero mester duna e pueblo un chèns pa hala rosea...

Ban ku ánimo i spera ku lo suavisá e medidanan un tiki...

Djabièrnè nos tei bèk, ku otro edishon di ‘Louie Louie’ ...

Tanten, huntu nos mester traha pa konstruí un Kòrsou duradero pa nos tur!..