Un felis djárason pa tur nos lektornan...

AMAK i Gobièrnu a yega na un solushon i ‘Tumba Revival 2021’ ta tuma lugá bou di kondishonnan mara den un protokòl...

Praktikamente tur loke ‘DEN E BEMBE’ a indiká djaluna a reflehá bèk den e protokòl ku Gobièrnu a entrega AMAK ayera...

E úniko punto ku nos a faya kuné tabata esun di PCR tèst ku Gobièrnu a disidí ku esaki no ta nesesario mas...

Ta keda un interogante si dikon a kita di 2 bai sero...

AMAK i músikonan ku lo partisipá na e evento ta kontentu, pero ayera nos por a tuma nota riba retnan sosial ku a surgi un malkomprondementu tambe ku tin algun músiko ku lo mester a forma parti dje orkesta ku a risibí notifikashon ku nan lo no partisipá mas, esaki debí na e medidanan...

Gregory Colina te hasta a publiká riba su página di facebook e kantidat di músikonan di bandanan ku lo forma parti dje orkesta...

Ma tuma nota tambe ku tin algun reakshon di karanan konosí di komunidat ku no ta di akuerdo ku e evento ta tuma lugá, nan a ekspresá esaki sea den komentario òf a publiká esaki riba facebook...

Mayan di konferensia di prensa i nos ta pendiente pa risibí informashon di kon henter e evento lo bai keda hinka den otro...

Den e protokòl di Gobièrnu tin pone bon kla ku e evento mester kaba pa 12 or di anochi...

E siman di Tumba Revival a bira un siman mas lat tambe, awor ta e siman di 8 pa 12 di febrüari 2021...

Na St. Maarten e Gobièrnu a tuma desishon ayera ku ta posponé Karnaval i tambe Heineker Regatta, dos evento grandi di St. Maarten...

E organisadó di Karnaval na St. Maarten a kuminsá promové e evento sin tabatin un akuerdo ku Gobièrnu...

Gobièrnu di St. Maarten a basa su desishon riba e kantidat haltu di kontagio ku tin ainda riba e isla...

Tin un organisashon ku ta preparando un evento grandi estilo ‘drive thru’ ku lo mester tuma lugá próksimamente na Kòrsou...

Nos a komprondé ku e ‘genio’ tras dje evento aki si tin su plan bon hinka den otro i ya tin un konsepto di su protokòl riba mesa pa sigui ku kombersashon ku Gobièrnu...

Músikonan no ta parando ketu den e temporada aki, ta basta produkshon musikal ta keda presentá den e último dianan aki i di tur klase di género...

Tin diferente produktornan musikal ku den e dianan aki ta trahando riba jingle pa partidonan polítiko...

Nos ta pendiente pa manera e wikènt di sostené lista pasa pa kuminsá tende jingle di partidonan...

‘Louie Louie’ ta bai, djabièrnè nos tei bèk ku otro edishon ...