Felis djabièrnè na tur nos lektornan...

Ayera AMAK a tene su rueda di prensa pa duna informashon riba e Tumba Revival Festival...

E ambiente na Hacienda Olivia tabata tremendo, koleganan di medionan di komunikashon ku tabatin basta ratu sin topa otro a topa atrobe ...

Na final dje anochi Hermanito a puntra: ‘Te ki dia atrobe’...

AMAK ta praktikamente kla, nan ta kombensí ku nan lo kumpli ku tur loke tin para den e protokòl i den e organisashon mes nan tin un persona sertifiká pa atendé ku ‘Crowd Management’...

Chayenne Gonzales ta enkargá ku e parti di ‘Crowd Management’ i seguridat pa djabièrnè anochi...

Feco ta kontentu ku e aporte ku el a risibí di branding partners pa por realisá e evento...

E proyekto i plan ku AMAK  ta bai realisá ku Tumba Revival Festival lo mester sirbi tambe pa otro eventonan kultural manera Kantadó Mayo i tambe Un Kanto pa Kòrsou...

Ban spera ku esaki tambe por keda realisá i ku e organisashonnan lo por usa e formato aki pa prepará i produsí nan evento...

E proyekto aki lo ta base tambe pa mas proyektonan musikal por tuma lugá...

Ya kaba ‘Louie Louie’ a kuminsá tende di plan ku algun famia tin pa por disfrutá dje siman di Tumba Revival...

‘Jump In’ virtual tambe ta na kaminda...

Nos a tuma nota di un konsierto/ jump in virtual ku lo tuma próksimamente...

Promotor i bandanan a kuminsá bira mas kreativo i tin un bon evento hinka den otro...

Ma gosa Gregory Colina ayera ora ku el a hiba palabra...

Maestro a broma ku su logronan den Festival di Tumba ...

E loke mas a resaltá ta su rèspèt ku e tin pa otro músikonan, areglistanan ku a yega di gana Festival di Tumba...

Tur areglista ku a yega di gana Festival di Tumba lo tin e honor pa por dirigí e orkesta pa e presentashon di nan tumba ganadó...

Ensayonan ta kanando bon i Gregory a informá ku ya nan a pasa 9 dje 20 tumbanan i ta pendiente pa den e wikènt aki por terminá ku e sobrá 11 tumbanan...

Ku ‘pasa’ nos ke men e base di e tumba, ainda falta ensayo ku koro i tambe sekshon di brass...

‘Louie Louie’ ta premirá ku e interes pa wak e Tumba Revival Festival lo bai sigui krese segun dianan ta yegando...

E interes for di Aruba, Boneiru, St. Maarten i Hulanda ta grandi i nos ta pensa ku e djabièrnè lo bai resultá meskos ku e anochinan final di Festival di Tumba...

Pió awor ku e transmishon ta grátis loke ta hasi ku mas hende lo por sigui e transmishon...

Nos tei move, disfrutá di bo wikènt na midi...

Te djaluna ku Dios ke!...