Siman a parti na dos aki...

Un felis dia pa bo...

Ensayonan ta tumando lugá den Festival Center i mester bisa ku e interes pa wak e Tumba Revival Festival ta sigui subi...

Tin yen proyekto pendiente pa tuma lugá i Gobièrnu a saka un komunikado kaminda nan ta informá ku e komishon di aktividat di Gobièrnu, TAC, ta disponibel pa duna informashon na esnan interesá pa organisá un evento...

Ta bon ku TAC ta disponibel pa duna informashon, paso tin hopi interogatorio pa loke ta trata kiko por i kiko no por organisá...

E género urbano ta hopi aktivo den e temporada aki...

Basta artista urbano lokal ta sea den studio o ta pendiente pa próksimamente lansa nan produkshon musikal nobo...

Artistanan solista i produktornan musikal tambe ta sigui traha i produsí músika...

Importante ta pa bo keda den ‘picture’ pa loke ta trata farándula lokal, bo kai sinta i sinta warda pa e pandemia pasa pa bo sigui propagá bo mes, bo ta kai atras...

Despues ku ántayera Gobièrnu a anunsiá ku no ta bin kambio den e medidanan i ta alargá e medidanan te ku dia 22 di febrüari, e situashon penoso pa farándula ta sigui sin un fin na bista...

A ni e temporada di elekshon, kaminda bandanan tabata haña oportunidat pa presentá pa diferente organisashon polítiko segun mi no ta bai tuma lugá mas...

LOUIE LOUIE no ta kere ku lo bai duna oportunidat na bandanan pa presentá pa públiko...

Fundashon Kultural Seú Kòrsou e wikènt aki tin reunion pa e gruponan di Seú i tambe gruponan Rítmiko...

Ta interesante pa sa si gruponan rítmiko ta inkliná pa organisá un Festival di Kantadó Mayo virtual...

E opshon tei, mester wak ki konseho e tim di Gobièrnu lo duna den e kaso aki...

Ma tuma nota ku algun músiko ku ta toka estilo ‘entertainment’ ku a kuminsá presentá na sitionan públiko...

Esaki sigur ta un bon stap den e direkshon ku nos ke pa farándula kuminsá move...

Tanten ku e públiko por dominá nan mes i no baila, mi ta kere ku mas músiko i gruponan chikí por kuminsá presentá...

Nos mester adaptá nos mes na e situashon i sali dibertí i sinta disfrutá dje presentashon musikal sin sinti e kishikishi pa lanta baila...

Pa e yu di Kòrsou esaki ta algu praktikamente imposibel, pero ta e opshon ku tin aworakí...

E proyekto di un dokumental relashoná ku Festival di Tumba Hubenil ta den fase di ehekushon...

Grabashon ta tumando lugá i ayera Louie Louie por a tuma nota di un ‘teaser’ ku a keda produsí pa kuminsá duna publisidat na e proyekto...

Nos tei move, djabièrnè ku Dios ke nos tei bèk...