Nos a yega otro wikènt aki...

Ayera nochi nos a bai wak e estreno di ‘Kurason di un Pueblo’, e pelíkula di Karnaval ku a keda produsí pa Coridja Stars Productions i Dolph van Stapele...

Nos a keda impreshoná pa e presentashon i e públiko presente tambe a disfrutá di bati man na final dje presentashon...

Kòrsou tin un tremendo produkto ku sigur lo bai promové Karnaval di Kòrsou riba merkado internashonal...

Corrine tabata kontentu ayera nochi despues dje estreno dje pelíkula...

Su konvikshon ku e pelíkula lo kontribuí grandemente pa promové Karnaval di Kòrsou kompaña pa e sosten ku el a risibí di su spònsernan lo pèrkurá e promoshon kana di forma zetá...

E evento di ayera a resultá pa hopi hende un chèns pa topa ku otro ounke no tin un evento di Karnaval tumando lugá...

Tabatin hende ku tin sigur algun luna si topa otro...

COVID-19 a pone hopi hende keda na distansia i ayera, despues di basta ratu nan a topa i bo por a mira e legria den nan kara...

Den e pelíkula Shon Benchi ta konta algu dje historia di inisio di Karnaval i su manera chistoso di relatá e historia a pone e sala bou di harimentu...

Nos a tuma nota dje konsierto di radio emisora HOW durante wikènt ku ta tras di lomba...

Awe den ‘DEN E BEMBE’ nos tin un relato dje anochi di galardon di HOW Radio Christian Music Awards...

Dolce a lansa un cover di e piesa ‘El Juidero’, kombertí den un roadfire ku ta keda interpretá pa Rumi March...

E agrupashon musikal ONE tambe a lansa un vershon nobo di ‘Awor mas ku Nunka’, un dje tumbanan eksitoso di Dibo D...

Ora mi splika ku nos bandanan lokal i artistanan lokal ta sigui produsí músika no opstante ku e pandemia tin nos molestiá i tin farándula praktikamente plat, ta algu ku sigur nos mester apresiá...

Esun ku sinta ketu lo kai pèrdè i lo bira sumamente difísil pa e rekuperá na momentu ku permití presentashon musikal...

Lisette de Leeuw a lansa un kansion nobo titulá ‘Rei di Pas’...

E produkshon aki ta un komposishon di Juan de Leeuw i Lisette de Leeuw...

Areglo dje piesa ta den man di maestro Enrico Henriquez...

Lidernan di gruponan di Seú i tambe lidernan di gruponan rítmiko, no lubidá ku e wikènt aki Fundashon Kultural Seú Kòrsou tin reunion tantu riba djasabra pa gruponan di Seú i djadumingu pa e gruponan rítmiko na Klup di Shell, asistí pa dje forma ei bo ta bon informá...

Nos tei drenta un wikènt, kòrda mantené bo mes na e reglanan di higiena i distansia sosial, evitá ku bo ta keda kontagiá pa e vírus!.

Kuida kurpa te djaluna ku Dios ke!...