Un bon siman na tur nos lektornan...

Kon a bai ke wikènt? ...

Survival su ‘One for the Road’ indudablemente tabata e fiesta di wikènt i a kompetí pa ta e fiesta di aña...

E públiko ku asistí na e fiesta sigur lo sostené esaki...

E pregunta grandi ta si esaki tabata berdaderamente ‘One for the Road’, paso esnan ku no a bai huntu ku esnan ku a bai ta loko pa un ñapa mas di Survival...

Henter e konsepto ku a keda presentá djasabra anochi tabata tremendo, a tene kuenta ku tur detaye i e satisfakshon dje públiko tabata un di 5 strea...

Ayera ‘Louie Louie’ a presensiá e presentashon di trahe di Grupo Aloha pa Karnaval 2018...

Bon ambiente serka e hendenan di Aloha...

Nan trahe ta kolorido i ku e ambiente di ERA komo nan ‘House Band’ mi ta miranan riba kaya kaba selebrando nan di 15 aniversario...

Pancho, Mike e sobra dje tim di Aloha bon presentashon...

Hòmbu mi’n tabata sa ku Maarten van de Laar a bira un klarividente...

Maarten aki mester a haña bon puntuashon na skol pa Drama òf loke aworakí ta konosí komo CAV, Culturele Artistieke Vorming...

Kos ta ‘HOT’ banda di Colorevents, e organisadónan di ‘Furia Latina’...

Públiko a reakshoná bon riba e konsierto i ta basta hende ta pendiente pa bai wak Ozuna i Plan B huntu ku nos artistanan lokal dia 4 di novèmber próksimo na Sambil...

Awe e siklo di ‘Leerorkest’ na Kòrsou ta kuminsá...

E skol di fundeshi ‘Maria Auxiliadora’ na Sta. Maria a keda skohe komo promé skol kaminda lo bai duna formashon musikal na e hóbennan...

E proyekto ku ta un ulandes tei hasi su entrada na Kòrsou i espektativanan ta haltu pa esaki...

Tania Kross i Izaline Calister ta dos dje artistanan ku ta sostené e proyekto aki...

Mañan ‘DEN E BEMBE’ lo tin mas informashon di e proyekto ‘Leerorkest’ ku ta kuminsá awe...

Akisha Albert, un di nos beyesanan lokal a sali ayera pa Bolivia kaminda lo e ta partisipando na e sertámen di ‘Miss Hispanoamerica’...

Nos ta pendiente tambe pa Chanelle de Lau, Liane Bonofacio i Nashaira Balentien ku tambe ta pendiente pa bai representá Kòrsou den diferente sertámen di beyesa...

Kòrsou tin dushi hende i hopi beyesa !....

I mañan ta fecha pa e konsierto di Blues den Riffort Village...

Fundashon Bon Intenshon huntu ku e barku krusero ‘Legendary Rhythm & Blues’ ta organisando e konsierto ku presentashon di 4 artista grandi den e género di Blues...

Pa 4’or e konsierto lo kuminsá i pueblo di Kòrsou, sigur amantenan di músika Blues ta keda invitá !...

Mi tei move, un bon siman i den rekta final di 2017 aki, ban sigui traha pa adelanto di Kòrsou...

Djárason ku Dios ke mi ta bèk !...