Un felis dia na tur nos lektornan...

Nos a yega otro wikènt i nos ta spera ku awe no bira manera siman pasa...

Ayera nos a tuma nota kaba ku e kantidat di kontagio a subi 10, loke mester ta un tiki preokupashon...

Na Boneiru e situashon ta a bira serio i awe mainta Gobièrnu a keda pa anunsiá su medidanan...

Nos a tuma nota ku mas i mas e bandanan chikí a kuminsá hasi presentashon, esaki sigur ta un nota positivo...

Ku ta sigui organisá fiesta den skondí tambe ta un echo i nos por a tuma nota ku Polis manera nan tuma nota di e kaso ta presentá pa para esaki...

Den e siman aki un dje sitionan basta popular aki na Kòrsou, Madero a keda será komo medida di Gobièrnu pa inkumplimentu ku reglanan establesé...

Esei mester ta un indikashon pa tur otro establesimentu ku mester tene kuenta ku e reglanan i mantené esaki na bo negoshi...

Nos músikonan ta sigui produsí i esaki ta mantené e ambiente musikal bibu, loke ta masha importante...

E desishon pa realisá e konsierto virtual ku e Kantadonan Mayo ta algu ku nos ta kere ku bai kapta hopi atenshon i lo tin praktikamente mesun impakto ku Tumba Revival...

Ensayonan a kuminsá kaba i nos a komprondé ku awe tin ensayo di un di e dos gruponan rítmiko...

E krea mesun stail di ‘all star band’, pero a forma dos grupo rítmiko ku músikonan di e diferente gruponan rítmiko ku tin kustumber di partisipá na e festival di Kantadó Mayo...

Nos ta pendiente pa Fundashon Kultural Seú Kòrsou tene nan rueda di prensa pa di forma ofisial anunsiá e evento i sobra detayenan di esaki...

Segun ma komprondé ku mester kaba di konfirmá algun detaye dje evento promé ku anunsiá esaki ofisialmente...

E echo ku artista i músikonan di Kòrsou por promové nan musika awor via di Spotify ta habri e posibilidat pa mas komersialisashon di nan produkto i pa por risibí pago pa esaki...

Nos a tuma nota ku por ehèmpel artistanan di e género Urbano tabata kontentu ku e posibilidat ku Spotify ta ofresé awor...

Buleria segun mi ta e promé banda Antiano ku a pone nan produkshon musikal riba e plataforma di Spotify...

E EP ‘Dushi Kompa’ ta riba Spotify i esaki lo bira un plataforma kaminda e banda lo por risibí entrada a base dje kantidat di biaha ku e piesa keda baha pa wòrdu skuchá...

Ayera tabatin un ‘vrum vrum’ ku dos konosido presentadó lo a entrega nan retiro, pero despues ma risibí informashon ku esaki no ta kuadra ku bèrdat...

Kaminda tin huma, tin kandela, ban wak kiko lo resultá di ta e bèrdat...

Ma komprondé ku e informashon a keda ninga, pero e dos personanan ku nan nòmber a wòrdu menshoná no a duna niun pia di palabra...

Disfrutá di bo wikènt, kòrda mantené bo mes na reglanan di distansia sosial i kaminda tin mester kòrda bisti bo ‘tapa boka’...

Felis wikènt! Djaluna ku Dios ke nos tei bèk...