Un felis djárason pa tur nos lektornan...

Great di mira kon hopi hende a akudí na Riffort Village ayera pa presensiá e presentashon di 3 artista di Blues...

E presentashon grátis aki ta forma parti di un proyekto ku Fundashon Bon Intenshon i Ofisina di Turismo ta trahando riba dje pa logra atraé e bishita mas frekuente di e krusero di Blues...

E barku krusero aki ku ta nabegá ku 1800 pasahero ta un barku di ambiente ku presentashon di artistanan grandi di e género di Blues riba e barku...

Meta final dje proyekto lo mester bira ku e barku lo ta na Kòrsou den e siman di Curaçao International BlueSeas Festival i dje forma ei logra atraé mas turista na Kòrsou pa e festival internashonal di músika Blues...

Djabièrnè awor tin e re debut di Grupo Sorry ku Kleine Man i Tula den front...

E re debut ta tuma lugá na Dulce Linda Snack na Saliña huntu ku Los Originales, e ‘heavy weightnan’ den Aguinaldo...

Dodgers a gana e promé wega di Serie Mundial...

Mi tin e impreshon ku e dos timnan aki ta basta pareu i ta esun ku probechá dje momentu oportuno lo gana e serie...

Michele Henderson tabatin otro tremendo presentashon riba Freewinds...

E kantante oriundo di Dominica tin kustumber di presentá riba Freewinds aki na Kòrsou...

Nos ta yegando fin di òktober i mi no a tende nada mas dje festival di kanto ku famia Willems a keda pa organisá na memoria di George Willems...

Mi mester yama Silvana òf Keke pa mi risibí mas informashon riba esaki...

Tin interogatorio atrobe riba e presentashon di artistanan internashonal den luna di desèmber i pa temporada di Karnaval...

Ma komprondé tambe ku AMAK tin intenshon di pone e partisipashon di Buleria den Festival di Tumba riba mesa durante di nan reunion general...

Ma komprondé tambe ku negoshashon pa ku organisashon di Festival di Tumba ta kanando i ku tin diferente interesado...

Feco ta optimista ku lo e sali for di e situashon i ku nan lo presentá e opshonnan na miembronan próksimamente...

Palabranan di kondolensia ta bai na Juni Aniceta ku fayesimentu di su Mama...

Djis pa bo tuma nota dje diferensia. Na Aruba ya nan a kuminsá ta promové e ‘fakkel optocht’...

Siendo un dje promé aktividatnan di temporada di Karnaval di Aruba, e parada di fakkel ta pèrkurá pa pone riba 8 mil hende riba pia...

Gruponan di Karnaval ta esnan ku ta forma parti dje evento ku ta sirbi komo un bon fuente di entrada pa kubri gastunan di Karnaval...

Aki na Kòrsou ku eksepshon di 4 òf ta 5 grupo ku ta partisipá huntu den un ‘lot’, no tin niun aktividat kaminda gruponan ta uni pa organisá i logra konhuntamente pa yega na fondo...

Kos bon ta kos di kopia i nan mester por sinta huntu i yega na un fórmula...

Algun aña atras Licores Maduro a organisá un jump in ku 5 grupo, pero ta 3 dje gruponan a bende praktikamente tur karchi...

Nos tei move, djabièrnè mi tei bèk ku otro edishon di ‘Louie Louie’...