Nos a yega djabièrnè...

Un felis dia pa tur nos lektornan...

Nos ta kuminsá ku manda palabra di kondolensia na famianan di e popular kantante di tambú Aya Engelhart a bai sosegá...

Aya ta yu di Doña Mistica Stefania i tabata na kabes di ‘Aya i su grupo’ ...

Ta di lamentá ku ayera den dia nos mester a tuma nota kon rápido e notisia di fayesimentu a plama i ku esaki a pone ku te hasta e famia mester a reklamá e forma kon esaki a sosodé...

Nos ta komprondé bon bon loke ku Kherwin Sambo, ruman di Aya a trese dilanti via di un mensahe...

Duna famia un chèns pa por apsorbé e notisia i kaba di notifiká tur demas famia, promé ku kuminsá kore ke notisia ku e persona a fayesé...

Pabien na tur e músiko i kantantenan di Grupo OriRi ku ayera a selebrá nan di tres aniversario...

Den e ‘lockdown’ aki no por tabatin selebrashon, pero ora bo papia ku e lider dje grupo, Dj Danger, e tabata masha kontentu ku loke nan a logra te ku aworakí...

Den nos edishon di ‘Louie Louie’ ku a sali ayera nos a hasi menshon di e echo ku nos artistanan mester bira kreativo den e temporada aki dje pandemia...

Riba e punto aki awe ‘DEN E BEMBE’ ta kompartí ku boso e manera kon e popular animadó ‘Don T’ a skohe pa organisá aktividatnan kaminda di un forma sosial ta keda mantené su plataforma aktivo den e temporada aki...

Ku esaki bo ta mira ku loke nos a skibi no solamente mester ta den forma di presentashon musikal, pero ku e por ta den kualke otro forma positivo bo ta kontribuí...

Ku nos hendenan gusta kome ta un echo, aworakí den ‘lockdown’ ta promové ‘delivery’, awèl mi ta konta bu mi eksperensia ayera, ma yama un restorant ayera ku ta hasi delivery i kier e bestèl ko’i kome...

Tabata mas o ménos 6.30pm i promé ku mi kuminsá hasi mi bestelling, nan a bisa mi ku nan por tuma mi bestelling i ku esaki ta bai dura 1 ora pa e kuminda ta kla, apart nan a indiká ku mi mes mester bin buska loke mi pidi, pasó nan servisio di ‘delivery’ ta full kaba, pues no por hasi entrega di kuminda mas na kas...

E yùfrou ku a yuda mi a indiká ku nos ta realmente hopi drùk, hendenan ta kome hopi mener!...

Ora bo pone bo mes ku ta algu spesial bo kier kome, anto bo no logra, ta di dal e pan ku wòrs salu numa ku su kòpi te...

Kòrsou su tim di futbòl a gana ayera ku skor di 5 pa 0, pero mirando e partido nos por a tuma nota ku a faya algun okashon mas ku por a anotá gol i tambe e tim a manera drai trankil den e di dos parti dje partido...

Lástima ku públiko no por a bai stadion pa animá nos ekipo!...

Felis wikènt!