Un bon siman na tur nos lektornan...

Pronto rekuperashon pa tur esnan ku ta sufriendo kebrante di salú, spesialmente esnan ku ta interná den CMC pa motibu di kontagio di COVID...

Pa esnan tambe ku a pèrdè un ser kerí den e dianan ku ta tras di lomba, forsa!...

Farándula tambe ta den ‘lock down’ i no tin un lus na final dje tùnel ainda...

Ayera nos a sigui e ‘Bibando Sessions’ i nos a spera ku na final di anochi lo por a yega na un konklushon pa aworakí...

E loke nos por a konkluí ta ku por lo pronto nada no tei kambia...

Ta manera Gino a skibi ayera nochi: #bibando, #keriendo, #imaginando, #fantasia...

Nos no ta chèrcha e situashon pa farándula, pero e situashon aworakí no ta duna...

Ma papia ku Rignald Maduro ayera nochi i el a konfirmá ku AMAK no a keda invitá na ‘Bibando Sessions’...

E komishon na Interes di Farándula di AMAK tabata e promé organisashon na mesa pa reuní ku Minister Steven Martina pa habri farándula...

Segun mi pa rèspèt mester a invitá un di nan dos na e diálogo ku a tuma lugá ayera...

Manera nos a splika den un edishon di ‘Louie Louie’ algun siman atras, músikonan mester kuminsá pensa riba maneranan alternativo pa yega na entrada den e situashon aktual...

Tanten turesten, nos músikonan ta sigui produsí músika pa nan por sigui zona na radio...

Un kos positivo tin ku tur produktor musikal a mira e importansia pa produsí videoclip tambe di piesanan nobo ku ta subi merkado...

E videoclipnan, ounke dependé kon bo produsí esaki por ta hopi kostoso, ta yuda promové e kansion riba retnan sosial...

Ta interesante pa sa aki un aña kuantu entrada e plataformanan digital a produsí pa nos artistanan lokal...

Tin diferente plataforma ku ta wòrdu usá aworakí pa krea entrada i esei lo por ta un posibel fuente di entrada pa por yuda kubri gastunan di produkshon...

Produkshon di pelíkula tambe ta bayendo den bon direkshon, sigur si bo tuma nota loke ku a logra ku ‘Buladó’ i e reakshon ku tin aworakí pa ‘De Droevige Kampioen’...

Resientemente nos por a disfrutá tambe di ‘Klesh den Bario’ na televishon...

Nos talentonan artístiko mester sigui haña oportunidat pa nan por demostrá nan talento i lo bo mira ku nan lo sigui destaká...

Ban spera ku nos lo por sigui produsí produkshonnan na nivel i ku organisashonnan manera Prins Bernhard Cultuurfonds por sigui duna nan aporte na nos artista i músikonan lokal...

Ban sigui kuida, keda kòrda tur momentu pa bo propio seguridat i di bo sernan kerí ku ta na kas...

Un siman nobo, ban sigui traha pa adelanto di nos Pais...

Bon siman!...