Un bon siman na tur nos lektornan...

E wega di beisbòl di ayera nochi tabata tremendo...

E dos timnan ta bon, hopi bon bateadó...

Na Houston nan mester traha un estatua pa Altuve...

E gai venezolano ei ta eksepshonal...

Nos a yega na e penúltimo dia di òktober, fin di aña ta na horizonte...

Temporada di Tambú a kuminsá djasabra último...

Ma spera ku e públiko amante di tambú lo a yena Hòfi Bill, pero mirando potrètnan dje evento mi ta haña ku ta un lástima ku Kas di Kultura ta hasi su esfuerso pa organisá un evento kultural pa amantenan di tambú i nan no ta duna oido na e evento...

E konsierto di Pastor Charles Jenkins djasabra a logra pa hala un bon públiko...

For di komentarionan ma komprondé ku Jenkins i su alabansanan tabata inspirativo ...

Awe AMAK tin reunion general. Ban spera ku e músikonan ta duna oido na e yamada dje reunion...

E organisashon te ku último tabata tin problema konstante ku asistensia di músikonan na reunion ...

Si bo wak bon, e músikonan ta interesá den Festival di Tumba i den Premio Edgar Supriano...

Te hasta ‘master classes’ ku keda organisá den pasado no ta atraé e kantidat di músikonan ku e organisashon ke...

Ta un lástima ku e situashon ta asin’ei...

Djaluna otro siman ta fecha pa e ‘gimmick’ di Ilan Chester...

E evento ‘Taste of Music’ su promé edishon lo konta ku presentashon di Ilan Chester, Randal Corsen i orkesta i Junior Tecla...

Un kombinashon variá ku a hala atenshon di públiko sigur...

Nos a drenta e siman di Ozuna i Plan B...

Karchinan ta bayendo bon segun informashon dje organisashon...

Trabounan riba e lugá di parker di Sambil a kuminsá fo’i siman pasá ku instalashon di e dak di stage...

Ma komprondé ku e produkshon di Ozuna lo ta un fenomenal...

E tim di produkshon ta usando praktikamente tur tipo di efektonan ku tin disponibel aki na Kòrsou...

Marcha Kultural ayera tardi a demostrá ku poko poko pero sigur e ta sigui krese...

E tim tras dje evento mester sigui traha duru pa hasi e evento un anual ...

E logro di mas grandi ta pa logra atraé mas partisipante di gruponan eksistente di tantu Seú komo Karnaval...

‘Corks & Forks’ ta otro dje eventonan ku ta tuma lugá e siman aki...

E evento semper ta logra di atraé un bon públiko...

E públiko ku ta bai e evento ta un ku gusta sosialisá miéntras nan ta dal drinks i purba e diferente platonan ku ta keda ofresé...

Bon, nos ta bai. Un bon siman na tur nos lektornan. Nos tei bèk djárason ku otro edishon di ‘Louie Louie’...