Un bon siman pa tur nos lektornan...

Kon a bai ku bo wikènt?

Wikènt tras di lomba nos a dediká nos mes un ratu na deporte...

Huntu ku e tim di Extra Digital nos a bai hasi un ‘try out’ ku transmishon di beisbòl ...

Despues di basta un ratu sin transmití un wega di beisbòl a bai bon i nos ta pendiente pa manera e proyekto ta kla pa EXTRA anunsiá esaki...

QR Code ta e palabra mágiko pa e último siman aki, awe lo mi no ke bai dediká tempu na bakuna òf no bakuna, nos mester sigui kana padilanti...

Un dje proyektonan ku mi a tuma nota di dje i ku ta pendiente pa tuma lugá fin dje luna aki ta  esun di Francis Sling titulá ‘F* Perfect’...

Bo ta un fanátiko di poesia, muzik, arte anto bon vibra?

Resientemente, pa ta mas eksakto, den lockdown e artista Francis Sling a skibi diferente poesia tokante eksperensia nan di bida anto nan ta imperfektamente perfekto...

Pa presentá esaki na “mundu” Francis ta organisando un evento ku yama F* Perfect...

Durante e evento aki bo por disfrutá di poesia, muzik, arte anto hopi mas ...

Fechanan ta 25, 26, 27 i 28 di novèmber...

Otro dje eventonan ku tambe lo hala atenshon ta tuma lugá fin di luna di òktober aki, pa ta eksakto, 31 di òktober...

Despues di basta ratu Dibo D ta bèk riba tarima ku un ‘One Man Show’...

E mes a splika riba su página di facebook ku ta despues di algun tempu ku e tabata bezig ku muzik, porfin e por anunsiá ku lo tin un ‘One Man Show’ ku imitashon i mas...

Otro dje proyektonan ku lo ta di interes sigur pa esnan ku ta vinkulá ku eventonan kultura i di turismo ta esun ku Prins Bernhard Cultuur Fonds a lansa titulá ‘Fondo Culturismo’...

Te dia 1e di novèmber 2021 por entregá un idea di proyekto pa un petishon di supsidio na Fondo Culturismo...

Fondo Culturismo ke sostené proyektonan ku ta envolví nos mes kultura i poblashon na krea aktividat nobo pa e bishitantenan...

E proyektonan mester ta proyektonan ku por wòrdu presentá na e bishitantenan komo eksperensia ku ta basá riba un parti spesífiko di nos mes Kultura i ku ta wòrdu ehekutá dor di nos abitantenan lokal ...

Pa mas informashon bishita e wèpsait pbccaribbean.com/culturismo...

E ‘deadline’ ta konta pa entregá idea so, lo duna tempu pa presentá e plan final ...

Bo ta kana rònt ku bo idea ata bo chèns pa realisá esaki...

Den e tempu aki bo mester ta kreativo pa yega na proyektonan ku ta trese entrada pa bo sea komo músiko, artista òf empresario...

Nos tei move, tabata un plaser...

Bon siman!...