Un felis wikènt pa tur nos lektornan...

Nos a yega e wikènt di OZUNA...

E gran konsierto di Ozuna i Plan B... Furia Latina...

E dos kantantenan di Plan B ta yega Kòrsou awe i ta pendiente ainda pa e ora ei yegada di Ozuna ku lo yega Djasabra...

Ozuna manera tur hende sa tin su presentashon na Repúblika Dominikana durante di Festival Presidente i ta sali djei pa bin Kòrsou...

Ayera ‘Louie Louie’ a bai tira un bista na e lugá di parker di Sambil i mester bisa ku preparashon ta kanando bon, un stage bon grandi kargá ku lus i ledscreen pa pèrkurá pa un tremendo espektákulo di lus i efektonan visual...

Karchinan pa Furia Latina ta kanando bon i espektativa ta ku lugá lo bai ta yen i nos ta premirá un super bon ambiente...

Ma komprondé ku for di Aruba tin un kantidat grandi di fanátiko di Ozuna ku ta rumbo pa Kòrsou...

Un pakete, tur kos inkluí pa un wikènt na Kòrsou ku karchi konsierto inkluí a bende bon...

E wikènt aki ta kargá ku aktividat...

Un dje otro aktividatnan dje wikènt aki ta ‘Kosecha Kultural’ na Lanthuis Bloemhof, esaki sigur ta un evento pa famia bishitá i disfrutá di tur loke nan tin pa ofresé...

No ta solamente muzik lo keda presentá pero tin presentashon di diferente artista i aktonan kultural durante di dia...

Serenada, Dennis Aalse i su Big Band i Randal Corsen ta entre e atrakshonnan prinsipal dje evento...

Na Lanthùis Brakkeput Mei Mei tin ‘Corks & Forks’...

E evento ku anualmente ta atraé un públiko grandi...

Amantenan di biña i esnan ku gusta sali i dibertí sigur lo kue kabes pariba...

Ayera Kuerpo Polisial i JAG, e organisashon enkargá ku selebrashon di Karnaval 2018 a sinta na mesa pa kuminsá hasi algun palabrashon...

Nos ta pendiente pa dia 11 di novèmber awor ku ta fecha ku normalmente rònt mundu ta start ku e temporada di selebrashon di Karnaval...

Gobièrnu a manda bisa kaba ku e kalènder di aktividat ku ta riba retnan sosial no ta kuadra ku esun ofisial, pues ban wak si ta dia 11 di novèmber JAG lo tene nan rueda di prensa pa anunsiá e kalènder di Karnaval 2018...

Un aktividat ku tambe lo atraé bon públiko durante dje wikènt aki ta djadumingu awor e ‘Duck Race’ organisá pa Rotary Club Willemstad...

E evento ku ta tuma lugá na Waaigat lo tin un sètùp riba Plasa Mundu Merced kaminda lo tin animashon musikal di Gentz i ERA...

E evento ta start for di 12’or di mèrdia djadumingu awó...

Disfrutá di bo wikènt, no lubidá ku djaluna ta fecha pa e ‘gimmick’ pa e evento ‘Taste of Music’ di dia 2 di desèmber ku presentashon di Ilan Chester...

Nos tei move, te Djaluna ku Dios ke !...