Un bon siman pa tur nos lektornan...

Wer den desèmber aki ta pone ku bo ta sinti bu den un ‘Winter Curaçao’, solo ta baha trempan i wer ta bira friu anochi i no papia mes ora bo lanta mainta trempan i bai baña...

Situashon pa gruponan di aguinaldo i tambú ta keda fèrfelu...

‘Louie Louie’ a kombersá ku algun persona i e promé indikashon ta ku tabatin un reunion ku lidernan di grupo, pero ku no ta tur hende a keda invitá na e reunion...

Otro reklamo ku a bin dilanti ta esun di risibí kontesta riba petishon pa pèrmit pa organisá evento...

Ta resultá ku ta e djabièrnè promé ku e evento tuma lugá bo por keda sorprendé ku un kontesta riba bo petishon...

Sitionan ku tabatin kustumber di ta sitio ‘OKE’ pa organisá evento, awor ta keda ningá komo sitio di evento, esei na konsepto dje lidernan di grupo mester keda indiká for di momentu ku bo hasi e petishon i no e djabièrnè ora bo bai pa buska bo pèrmit...

Si esaki te situashon, mester pensa un manera pa evitá ku promotornan ta hasi promoshon pendiente pa risibí un pèrmit, anto den pitu nan mester kambia di sitio di evento...

Ma komprondé ku e presentashon di Chimbala a move pa Club Sugar...

Den kombersashon ku e promotor el a indiká ku e artista ‘La Insuperable’ lo no presentá e wikènt aki debí ku e tin solamente 1 bakuna...

E organisashon a posponé su presentashon pa 2022...

Nos ta kere ku ta un bon desishon ku e organisashon a tuma tambe...

Apart dje echo ku benta di karchi pa eventonan ta un dolor di kabes pa promotornan, pasó baidónan di evento ta tuma desishon den pitu, mester tene kuenta tambe ku áwaseru tambe tin su influensia...

Meteo a indiká ku por spera mas áwaseru den e temporada aki, loke sigur ta pone hende duda si nan ta bai un evento airu liber...

Yùfrou Shariengela Cijntje nos representante pa Miss Universe no a logra di drenta e ‘Sweet Sixteen’, pero loke ta importante ta ku el a risibí un eksperensia ku poko lo por pone riba nan CV di bida...

Aruba, Thessaly Zimmerman a logra yega den Tòp 10 di Miss Universe, un logro grandi pa nos Isla ruman...

E bunitesa di Pos Chiquito a keda sorprendé den e promé rònt na momentu ku el a keda skohé den e ‘Sweet 16’...

Djaweps awor tin rueda di prensa pa Festival di Tumba 2022...

AMAK lo bai duna informashon riba detayenan dje festival ...

Bon nos a yega na final di otro edishon di ‘Louie Louie’...

Ban sigui produsí pa adelanto di Kòrsou...

Bon siman !...