Un bon siman pa tur nos lektornan...

Kon a bai ke dianan di fiesta...

Mi ta spera ku tur hende a sa di disfrutá huntu ku famia...

Pas, Union i Felisidat reina den kada kas...

Lamentabel e kaso di tiroteo fatal kaminda un hóben tambulero ta fayesé...

Masha hopi reakshon di parti di músikonan i amantenan di e género di Tambú...

Palabranan di kondolensia na famia i amigunan músiko dje hóben Ashley Flaneur...

E ultimo siman di 2021 a kuminsá awe i nos ta pendiente pa Gobièrnu anunsiá e programa di ‘Sperando Tiru’ ku e aña aki lo ta di forma virtual...

Grabamentu di e parti musikal a start kaba i segun ‘DEN E BEMBE’ lo tin diferente segmento ku tópikonan interesante pa yuda empoderá e pueblo di Kòrsou...

Un dje situashonnan ku mi a premirá adelantá ku lo a bai trese problema pa ku mantenshon di orden públiko ta e echo ku un parti dje pueblo no ta respetá e regla di no ta permití aglomerashon riba kaya...

Na vários sitio durante dje dianan di fiesta bo por a tuma nota di aglomerashon di sea amigunan òf koleganan ku a kaba di traha i ta djòin otro na kualke lugá pa pasa oranan kontentu i dal do, tre ko’i bebe...

Di otro banda e kantidat di hendenan ku por ehèmpel ayera a bai pasa nan ‘booster shot’ na Poli di Sehos i SDK a surpasá tur espektativa...

Pa bo logra 3000 hende ta un bon logro, ban wak awó si durante dje dianan ku ta sigui aki, e kantidat ta keda meskos...

Segun mi tin hopi hende ku tin miedu di bira malu i esei ta pone ku nan ta skohe pa bai pasa nan ‘booster’ pa nan ta trankil...

Mi ta spera ku den e dianan ku ta sigui aki, e kantidat di kasonan positivo kuminsá baha atrobe, pa dje forma ei despues di e siman aki nos tuma nota ku e kantidat di kasonan aktivo tambe baha...

Mi no ta kere ku mester tuma dje tantu tempu ei pa por suavisá e medidanan atrobe...

E músikonan i sentronan di horeca tin hopi preshon riba nan, anto mester evaluá ku si di bèrdat ta nan ta e faktor di ‘klusternan’ di kontagio...

E kontròl tambe mester risibí e atenshon nesesario...

Mester kuminsá plania for di awor kiko lo mester ta e strategia nobo di kontròl na porta di eventonan, ta laga esaki den man di e promotornan mes, òf Gobièrnu ta bini ku un grupo ku lo supervisá esaki?...

Ora bo haña mei mei dje promotornan, un promotor ku ta ‘Hit & Run’, pues organisá 1 evento i djei bai drumi, esei ta bira e evento di riesgo, pasó pa e ta un chèns e tin pa gana sèn i baha bai, lubidá ku su desishon tin reperkushon pa tur sobrá...

Mi tei move, ban sigui kuida, tantu esnan ku a vakuná, komo esnan ku a tuma e desishon di no vakuná...

Bon siman!...