Un bon siman pa tur nos lektornan...

E di tres ‘Time Out’ di 10 ta den vigor ainda, pero ta yegando momentu ku lo no por sigui alargá esaki mas...

Esnan ku a kumpli ku tur loke ku Gobièrnu a stipulá no por sigui wanta mas...

E kantidat di kontagionan tambe a baha i mester yega un kaminda ku lo indiká ku nos tei sigui...

Medidanan, por ehèmpel but pa esnan ku no ta kumpli ku òrdu di Gobièrnu mester ta stringente pa esun ku ta fayando sinti ku tin medida...

Den wikènt ku ta tras di lomba Polis mester a bai para un fiesta klandestino den área di Jan Thiel, tin mas ta tumando lugá i nan no a keda kontrolá ainda, pero mester sigui ku kontròl i tuma medida mesora kontra organisadó i tambe esnan ku ta bishitá e fiestanan aki...

Mester tuma mas medida tambe, pero naturalmente tur den kuadro di lei...

Dikon mi ta tresiendo e kasonan aki dilanti, pasó si mi wak den paisnan grandi kuantu hende ta subi kaya pa manifestá kontra di medidanan i ku aki na Kòrsou nos ta trankil, mi ta kita e sombré pe pueblo lokal ku podisé no ta mansu, pero ta biba konforme regla i medidanan stipulá pa Gobièrnu...

Pero ta yega un kaminda ku mester tuma medida mas stringente kontra di esnan ku ta faya pa nos por bai bèk den e situashon normal ku adaptashon di e protokòl di higiena...

Pa empresanan ku mester stens riba públiko ku ta move riba kaya, esaki ta sosodé aworakí solamente den wikènt, den siman kos ta ketu i esaki a pone ku tin diferente negoshi ku no por karga mas ku e situashon i nan a sera, otronan a kuminsá baha kantidat di dia ku nan ta habri pa dje forma ei spar sèn...

E impakto ekonómiko ta hopi mas grandi di loke nos ta imaginá nos mes...

Manera ‘Louie Louie’ tabata indiká, nos tin yen banda i artistanan ku ta trahando riba nan produkshonnan...

Awe mes bo por tuma nota di 3 piesa nobo ku a keda lansá ayera i den e siman tras di lomba tabatin algun mas...

Great ku ONE Flavaz a produsí un medley ku tumbanan di Doble R...

Orirí tambe a traha un meskla di tumbanan popular ku sigur lo zona...

ICONS tambe tin piesa nobo, nan ta pendiente pa lansa ‘For Real’ kanta pa Hnly, dia di San Valentino...

Pa esaki nan tin un tremendo kampaña pa nan fanátikonan...

Despues di “ I’m moving On’ ICONS ta sigui produsí...

Pa djárason awor ‘Fefe Farandulero’ su tema lo ta: ‘Desaroyo di areglo fo’i 1971 te awor’...

Bo tin un sita ku Fefe Farandulero for di 7 or di anochi...

Tremendo tema pa presentá, analisá i tuma nota dje desaroyo importante den nos músika...

Nos tei move, tabata un plaser pa produsí otro ‘Louie Louie’...

Bon siman!