Bon siman, felis dia di San Valentino pa tur ku ta disfrutá dje dia aki ku ta un dia di amistat i amor...

Awe sòru pa bo keda spòrtif na momentu ku atardi yega i ‘nan’ no a manda flor pa bo...

Importante ta pa nos duna otro atenshon riba e dia aki...

Siman ta habri ku e ekspektativa riba kua desishon Gobièrnu ta bai tuma e siman aki relashoná ku e medidanan ku ta na vigor aktualmente...

Hopi ta bou dje impreshon ku mester sigui duna oportunidat pa mas aktividat por tuma lugá, pero loke ku tambe ta importante ta pa nos tende kon a bai ku e plan di bakunashon...

Segun mi e porsentahe di esnan ku ta bakuna mester tin un influensia riba desishon ku Gobièrnu tei tuma...

Pa Horeca i farándula mester sigui habri pa trabounan por normalisá...

Tin algun opshon ku a usa aña pasá ku ta na su lugá pa aworakí bolbe implementá nan i wak kon ta sigui despues di evaluá...

E kantidat di kontagionan a baha i e kantidat di hendenan ku ta interná na CMC tambe a baha...

Awe ICONS ta lansa nan piesa nobo, For Real’ kombiná ku e videoclip...

E videoclip di ‘Amor na promé bista’, kanta pa e duo Ross i Tony Shearman tambe a keda lansa...

Nada ainda pa loke ta trata informashon relashoná ku ‘Homenahe na Kantadónan Mayó’...

E presupuesto mester a wòrdu entregá pa djei un evaluashon tuma lugá pa loke ta trata e evento...

Bon reakshon pa ‘Jump In den bo kas’, basta hende a kumpra nan ‘voucher’ pa a disfrutá dje presentashon di nos bandanan, hopi a sera grupo pa huntu sinta dal drinks i gosa...

Ma asta mira potrèt di algun ku a te hasta drecha t-shirt i pone decor pa baila i gosa durante presentashon dje bandanan...

E evento un biaha mas ta demostrá nos kreatividat pa por logra organisá algu, ounke tin medidanan ...

Mi ta spera ku e promotornan/ organisadónan dje evento a logra di saka nan invershon pa e evento aki...

Ata Edsel Juliet ku otro piesa pa trese ambiente “ Mi’n ta baila ku Juana”...

El a inová tambe ku un videoclip ku ta ful animá (cartoon)...

Juana ta kayente !!!

Ken ke baila ku Juana?...

Na Hulanda e kantante Glennis Grace ku tin ‘rais’ aki na Kòrsou a keda detené den un supermarket relashoná ku menasa na e empleadonan...

Televishon Direct a skor bon ayera nochi ku e programa ‘Love is Magic’ tremendo show pa entretené esnan na kas...

Plantanan di Televishon mester sigui produsí programanan ku ta entretené e públiko televidente...

Nos a yega na final di otro edishon di ‘Louie Louie’...

Un bon siman pa bo!...