Un felis dia na nos lektornan...

Ayera nos tabatin un dia liber i awe ‘Louie Louie’ tei ...

Ban kuminsá ku un pabien na CUROM Broadcasting, empresa bou di kua Z86, Mi95, Rockorsou ta kai, ku nan selebrashon di 89 aniversario...

Fundashon Kultural Seú Kòrsou a reuní ku Sektor di Kultura ayera i si tur kos kana bon e ‘Homenahe na Kantadónan Mayo’ lo tuma lugá den luna di aprel...

Si mi no ta ekiboká ta riba djaluna 18 di aprel, fecha riba kua lo mester tabatin e ‘Marcha di Seú’...

For di 2003 te ku 2019 tin un total di 12 Kantadó Mayo ku a gana e premio i ku lo ta pendiente pa presentá den e show...

‘Rumba pa Tumba’ ku Glenn Thomas den e siman aki ta super!...

Sigur esnan ku ta na kas i esnan trahando ku tin televishon disponibel ta disfrutá...

Esnan nan Hulanda tambe ta lanta den mardugá pa disfrutá ...

Great pa tuma nota ku Gobièrnu di Kòrsou su Minister di Kultura a rekonosé i ta gradesido na e trabou ku ONE Flavaz ta hasiendo pa tene nos herensia musikal bibu i traspasá esaki pa e generashon di awor...

E medley ‘Biba Doble’ a rebibá un gran parti dje éksitonan ku Doble R tabatin durante di su partisipashon komo kompositor i tambe komo banda ...

Awor ku a hasi posibel ku ku eventonan por tuma lugá ta un sin fin di aktividat ta pendiente pa tuma lugá...

Ta masha hopi flyer a sali den e ultimo dianan aki...

Ta ser spera ku pa fin di luna di mart ku lo habri normal kaminda lo no tin restrikshon pa aktividatnan tantu paden komo pafó...

Tin diferente proyekto di Cafe/ diskotèk ku ta den fase final di preparashon ku lo keda habri den e próksimo lunanan...

E produkto ‘bida nokturno’ na Kòrsou mester subi na kalidat pa dje forma ei por atraé mas públiko inkluyendo turistanan ku lo sali for di nan hotèl i bai disfrutá di nos bida nokturno...

Mas hotèl, mas turista, mas konsepto nobo mester tin pa ofresé no solamente na e turista pero tambe na e públiko lokal...

E promotornan di konsiertonan ku artista internashonal tambe ta den preparashon pa wak si e merkado ta kla pa konsiertonan grandi...

E situashon tin ku normalisá promé ku por riesgá hasi algu kaminda ku e budget ta haltu...

Ayera nochi tabatin un anochi di informashon organista pa Prins Bernhard Cultuurfonds spesialmente pa esnan den e área di arte i kultura...

Mi ta spera ku lo tabatin hopi persona interesá pa risibí informashon kon nan lo por bin na remarke pa risibí fondo di sosten pa proyekto di Arte i Kultura ...

Nos ta despedí, djabièrnè nos tei bèk ku otro edishon di ‘Louie Louie’ ku Dios ke!....