Un felis djabièrnè na tur nos lektornan...

Nos ta drentando e rekta final di 2017 i ta basta moveshon ta tumando lugá pa loke ta trata eventonan i tambe fiestanan ku ta pendiente pa fin di aña...

Serka un animadó di radio ma tuma nota di un kalènder ku e tin traha kaminda bo por tuma nota ku luna di desèmber ta praktikamente tur dia tin 1 òf otro aktividat tumando lugá...

Promotornan ta bolbe hinka nan mes den un aventura ku algun fiesta banda di otro kaminda tin komponentenan similar formando parti di e fiesta...

Ban wak kon esaki ta bai resultá...

Tin algun konsierto di Pasku tambe ku ta bai pèrkurá pa bon ambiente den e fin di aña aki...

Kas di Kultura ta pendiente pa mas aktividat kultural den e dianan ku ta na kaminda...

Tur djárason ku a sobra den 2017 Zona Kultural ta presentá ‘Happy Hour’ Kultural...

Tur siman tin un grupo di Tambú i Aguinaldo diferente ta zona den ‘Zona’, ántes Luna Blou...

Mañan anochi ta toka turno na Grupo di Karnaval Zjangilae pa presentá nan trahe pa Karnaval 2018...

E presentashon di trahe lo tuma lugá na Tropical Hotèl na Rio Canario...

Manera ta kustumber dj Bradley lo ta esun ku ta bai animá e anochi...

Tur hende ta pendiente pa e tremendo fiesta di Fundashon Sinta Ros titulá ‘Simplicity’...

Awe nochi e tim di Sinta Ros lo ta den ambiente di Happy Hour na klup di ‘Wild Hogs’ riba Dr. Maalweg, pega ku Foto Studio Tramm...

For di 7’or te ku 9’or di anochi lo tin un kantidat di karchi limitá na balor di 50 florin...

Yega promé pa bo bebe awa limpi...

E fiesta benéfiko ‘Simplicity’ lo konta ku animashon musikal di ERA, Tune ku Jill Frans, Luwi Jano, Tico Libiree, Tico ‘Benoni’ Balentien i direktamente for di Ulanda, Clifton End...

Un fiesta ‘All in White, with a touch of Pink’ ku bo no tin mag di pèrdè...

Kumpra bo karchi i dje forma ei duna bo aporte na e fundashon...

Tamara Nivillac tambe ta pendiente pa presentá dia 21 di desèmber su ‘One woman show’ titulá ‘A Christmas to Remember’ aki na Kòrsou...

E konsierto aki lo tuma lugá riba Freewinds..

Aña pasa Tamara tabatin un konsierto ‘sold out’ na Ulanda i e aña aki a toka turno na Kòrsou...

E show ta inspirá riba shownan di ‘Broadway’ kaminda Tamara lo transformá su mes den un diva di dékada 60 pa hiba bo den un biahe musikal úniko...

No pèrdè e oportunidat úniko aki pa disfrutá di un konsierto úniko...

Bon, tabata un plaser pa nos kompaña bo awe, disfrutá di bo wikènt, djaluna nos tei bèk ku otro edishon di ‘Louie Louie’...