Un bon siman na tur nos lektornan...

Ayera tabata Dia di Mama i mi ta spera ku tur hende a disfrutá dje dia pa duna atenshon i otronan pa rekordá momentunan inolvidabel di nan Mama ku no tei mas ku nan...

Den e wikènt ku ta tras di lomba nos tabatin dos tremendo konsierto relashoná ku Dia di Mama...

Djasabra anochi na Betesda i ayera nochi na Avila, dos bon konsierto kaminda nos artistanan a bolbe lusi ku nan presentashon...

E loke ta mas great ta e echo ku e ámbos evento a ‘sold out’, loke ta indiká tambe ku e pueblo ke sali i disfrutá di eventonan di nivel...

Ayera ma tuma nota di un komentario riba e fiesta di Doble ku ERA kaminda e baidó di fiesta a reklamá ku e sitio kaminda e fiesta a tuma lugá no tabata adekuá pa esaki...

E no a duna masha komentario, pero ta indikashon si ku tin sierto fiestanan bo no por pone nan unda ku ta, bo mester keda kòrda riba e baidó di fiesta ku a paga pa por disfrutá di loke bo ta ofresé...

Pa esnan ku ta manehá e sitio tambe ta importante pa nan por tuma nota dje reklamo i drecha loke ku si dado kaso ta algu ku nan tin ku drecha...

Dj Adoni su presentashon tambe a resultá un éksito rotundo, hopi bon ambiente i komentarionan ku ma tende ta indiká ku e públiko sigur a disfrutá dje evento...

Ma tuma nota tambe ku Angelique Klooster ta masha gustá na Aruba, den wikènt el a bolbe biaha pa Aruba pa presentá durante di un konsierto pa Dia di Mama na Aruba...

Ayera ta manera niun hende no a kushiná na kas...

Restorantnan popular tabata yen te den oranan lat di atardi, tur hende a disidí di bai kome ku Mama, kushina a keda limpi...

Un kos si mester remarká ku tabatin diferente restorant ku no tabata prepará pa e preshon di kantidat di kliente, loke a pone ku mester a warda masha hopi promé ku por a kome òf ku no a risibí e servisio adekuá...

Mi ta kere ku esaki tin di aber ku prepará adelantá pa dianan di fiesta i pone sufisiente personal riba pia...

E sektor di Horeca ta moviendo bon, pero mester sòru pa e kliente, tantu lokal komo estranhero wòrdu bon sirbí...

Un eksperensia robes, por tin konsekuensia despues...

Esaki ta konta meskos pa sitionan di entretenimentu...

Gruponan di Seú a kuminsá promové nan mes mas tantu ku presentashon di nan trahe pa e Marcha di Seú dia 3 di yüli próksimo...

Gruponan di Karnaval tambe a kuminsá organisá nan mes pa prepará pa 2023...

Finalisando pa awe, nos mester bisa ku ayera nochi nos a disfrutá tambe dje konsierto ku Juni Juliet a presentá na TeleCuraçao ku diferente artista lokal...

Ounke ta un ripitishon di un konsierto ku a keda presentá aña pasá, pero el a kai den masha bon tera i na e momentu oportuno...

Nos tei move, te Djabièrnè ku Dios ke!...