Un felis djabièrnè pa tur nos lektornan... 

Nos a yega wikènt i p’e wikènt aki tambe tin yen kaminda pa bai...

Tin un situashon fèrfelu na horizonte den medionan di komunikashon...

Ma tende ku na un medio di komunikashon tin plannan avansá pa pone trabou abou dado kaso desishonnan ku mester keda tumá den e di dos parti di novèmber aki no ta loke ku e personal dje medio ta di akuerdo kuné...

Ma komprondé ku trahadónan ta fadá dje situashon aktual i nan ta desidido pa protehé nan posishon hurídiko i ta kla pa buta trabou abou dado kaso desishon no konforme palabrashon keda tumá dor di e tim di maneho...

AMAK ta pendiente pa ta kla pa dia 8 di desèmber manera nos a indiká djárason último...

‘Louie Louie’ a komprondé ku nan ta na mesa ku praktikamente tur hende i ku ta usando un plan stratégiko pa por logra pone tur hende riba e barku ku yama ‘Festival di Tumba’...

Ma komprondé ku AMAK a kombersá tambe ku diferente kompania di zonido...

Nan a splika mi ku nan a kombersá ku te hasta ku un grupo di Aruba, pero no tabata na altura ku e kompania di Aruba tin lasonan hopi estrecho ku un kompania lokal...

Tin te hasta un kompania ku den kaya tin bisa ta usando spikernan chines ku ta pega kandela ku a aserká AMAK pa sondea e posibilidat pa produsí Festival di Tumba...

Pa otro siman e organisashon enkargá ku Karnaval 2018 lo tene nan rueda di prensa...

Tin yen spekulashon den kaya, loke ami por bisa ta: Laga nan hasi nan presentashon i despues bo por duna komentario, no spekulá promé ku bo tende for di ‘The horses mouth’...

Ta masha importante pa bo drai ku un mente positivo, nos ta hopi biaha kla pa habraká kibra kos riba un base emoshonal...

Promotornan di fiestanan lokal ta man na kabes despues ku rumor a kuminsá kore ku a ninga pèrmit na un grupo di promotor ku ta pendiente pa presentashon di un konosido artista lokal, pero ku no ta residensiá na Kòrsou...

Parse ku a ninga e pèrmit di presentashon i awor e grupo ta pendiente pa wak kon ta bai hasi awó, pasó si e artista nase na Kòrsou mes no por presentá, ta kon otronan ku no ta nase na Kòrsou por presentá...

Mi ta mira ku promé ku desèmber yega lo tin un diskushon entre promotornan i gobièrnu riba e punto aki...

Loke bo sembra bo ta kosechá, dia a yega na e briante idea pa inkorporá e artíkulo ku ta prohibí presentashon di artistanan no inskribí na Kòrsou, durante dje periodo di 1 di desèmber pa djárason di shinishi, niun hende, ni e ‘brain’ tras di e artíkulo aki no a premirá ku esaki lo bai bira un problema...

Awó ta ku ‘ontheffing’ ke trata na regla tur kos...

‘Louie Louie’ ta bai, djaluna nos tei bèk! ...

Felis wikènt !