Un bon siman pa tur nos lektornan...

Mr. Burna Boy su presentashon na Kòrsou a resultá un tremendo konsierto...

Na momentu ku a anunsiá e konsierto di Burna Boy tabatin masha skeptisismo relashoná ku no ta un artista konosí...

Ora bo mira kon públiko a reakshoná riba e presentashon di Burna Boy, kantando huntu kuné i disfrutá di su presentashon, bo ta yega na e konklushon ku esnan ku tabata duna komentario no konosé e merkado at all...

Públiko, artistanan lokal i te asta Burna mes a aploudí loke ku e promotornan a hinka den otro...

Nos mester aploudí ora ku promotornan kumpli ku tur loke nan a propagá...

E tim ku a produsí e konsierto mester risibí kòmplimènt pa loke nan a presentá...

Nos ta spera ku e evento tabatin un saldo positivo pa dje forma ei esaki enkurashá e promotornan pa bin ku mas artista Kòrsou...

Un komentario ayera di un funshonario Gubernamental segun mi no tabata na su lugá...

E komentario ku promotornan sòru paga belasting pa por tin presentashon di otro artista internashonal na Kòrsou no ta na su lugá...

Pa kuminsá ta trata di 2 promotor diferente, pues e komentario no ta kuadra, sigur si ámbos promotor a i ta kumpli ku e eksigensianan di Gobièrnu pa organisá nan konsierto...

Djabièrnè último nos a duna komentario riba e ‘set-up’ di e konsierto di Burna Boy i awe nos ta bolbe enfatisá, ku AMAK mester traha riba un konsepto nobo pa loke ta trata nan ‘set-up’ pa Festival di Tumba...

Mester bin ku inovashon, esei ta klave pa futuro dje festival, apart dje kompetensia entre kompositornan...

Djasabra anochi Ike Jesurun a risibí su homenahe, esaki a resultá den un tremendo konsierto den PWFC...

E públiko a keda enkantá ku e presentashon di vários di nos artistanan lokal ku a interpretá éksitonan di Ike...

Awó, nos tin un komentario si pa nos artistanan lokal...

Rumannan ban serio ku e vestuario ku nos ta bisti na momentu di presentashon...

Bistimentu ta algu masha importante pa unda bo ta bai presentá...

Tin un kódigo di vestuario pa kada sitio ku bo ta bishita, meskos pa kada kaminda ku bo ta presentá...

Promotornan ku tin basta ratu sinta ta wak kon públiko lokal ta reakshoná riba eventonan grandi a haña un empuhe wikènt tras di lomba...

Papiando di eventonan ku ta pendiente, ta keda konfirmá ku dia 27 di desèmber 2022 lo tin 1 konsierto ku presentashon di Rick Ross i Broederliefde...

‘Louie Louie’ mes a hasi menshon dje presentashon di Rick Ross na Kòrsou pero no tabatin e fecha, ayera nochi e promotor a konfirmá fecha pa nos i e kombinashon ku Broederliefde...

Bon nos tei move, deseando bo un bon siman i ku nos tur lanta ku ánimo pa hiba nos pais dilanti!...