Un felis djabièrnè na tur nos lektornan... 

Ayera mèrdia ora mi a tuma nota dje frontpage di La Prensa kaminda nan ta anunsiá ku ta e último publikashon di La Prensa e kos ei a dal mi basta duru...

Ta einan ma kuminsá skibi pa korant...

Norwin Josepa di felis memoria tabata mi mentor na momentu ku mi a kuminsá skibi na La Prensa...

E kolumna di Karnaval ‘Kimina Kimina’ mi tabata enkargá kuné i durante di 10 aña mi a pèrkurá pa tur temporada di Karnaval produsí ‘Kimina Kimina’ ...

Forsa na koleganan di La Prensa ku awor despues di laborá un kantidat di aña pa e empresa mester kuminsá di nobo...

ACU awe ta anunsiá ku Gentz lo bira e remplaso pa OREO...

Gentz sin duda ta un tremendo remplaso pa OREO i nos tin sigur ku nan lo pèrkurá pa pone tremendo ambiente riba Kleine Werf mañan anochi...

Awe ta fecha pa e konsierto di Jazz na Avila Beach Hotel...

Hershel Rosario i Ronchi Matthew huntu ku un elenko di músikonan lo presentá un konsierto relashoná ku e selebrashon di 25 aniversario di Blues Bar & Restaurant...

Ayera ma topa Hershel i el a bisa mi ku tin un homenahe awe nochi ku bo no tin mag di pèrdè...

Kumpra bo karchi pa bai disfrutá dje presentashon di nos músikonan den ambiente di Jazz ...

Ayera nochi ma mira e video clip ku a keda produsí pa e kansion ‘Henter aña nos ta den Paranda’, komposishon di Yumarya Grijt ku kolaborashon di Dibo Doran i Rich Pieter i ku di un forma eksepshonal a keda areglá pa Randal Corsen...

E videoclip produsí pa QD ta un alegre ku sigur ta kuadra kompletu ku e konsepto di e piesa. Bon trabou...

Djadumingu awor JAG huntu ku Servisio di Kultura i Deporte ta presentá un rueda di prensa pa anunsiá tur detaye relashoná ku temporada di Karnaval 2018...

E konsierto di Pasku ku Instituto pa Formashon Musikal a presentá na Landhuis Brakkeput Mei Mei a duna un biaha mas un impreshon kon bon Akademia Maestro Errol El Toro Colina su kuríkulo di formashon musikal ta hinka den otro...

Feco tin tur motibu di ta orguyoso di loke e hóbennan a presentá i ta presentando...

Muzik na nivel ta loke ku a keda presentá ...

Ban spera ku e organisashon lo risibí sosten finansiero pa por sigui ku e proyekto aki ...

Bon wikènt a kuminsá aki, disfrutá di bo wikènt, sali i dibertí...

Djaluna nos tei bek ku otro edishon di ‘Louie Louie’...