Un bon siman na tur nos lektornan...

Kon a bai ke wikènt...

Basta hende riba kaya e wikènt ku ta tras di lomba...

Fiestanan a bai bon i aktividatnan tambe a risibí bon bishita di públiko...

E selebrashon di 25 aña Blues na Avila tabata tremendo...

E públiko sigur a disfrutá di e presentashon musikal di nos artistanan lokal, spesialmente e núkleo di artista ku semanalmente ta presentá den e restorant Blues na Avila Beach Hotel...

E fiesta di ACU a resultá un éksito. Esnan ku a warda te último momentu pa bai buska karchi a bin dal den duru, pasó e sosionan a move fo’i tempran pa sigurá ku nan ta den e fiesta di selebrashon di 55 aniversario di e koperativa...

Un dje eventonan ku ‘LOUIE LOUIE’ mester hasi menshon di dje komo tremendo idea tabata ‘Garbage is the new Music’...

E evento pa konsientisá riba resiklahe ku a keda organisá pa Selikor i MCB a logra partisipashon di un kantidat grandi di skolnan sekundario ku a hasi presentashon musikal ku produktonan bon pa resiklahe...

Karnaval 2018 ta na kaminda...

Ayera tardi Gobièrnu i JAG, e organisashon enkargá ku Karnaval 2018 a tene nan promé rueda di prensa kaminda nan a duna diferente informashon relashoná ku e selebrashon di karnaval...

Awe ‘DEN E BEMBE’ a publiká algun di esnan mas importante i pa mañan nos ta kompartí mas dje informashonnan...

Loke ta importante ta ku Gobièrnu ke pa Karnaval tuma lugá den un ambiente di Pas, Kumplimentu i Alegria...

Fundashon J.A.G. ke enkurashá pueblo di Kòrsou pa ‘Ban Bèrdè’...

‘Bèrdè’ den pensamentu, den sentimentu i aktitut...

Den e forma aki ta krea un karnaval, un medio ambiente i un Kòrsou sin polushon...

Ora ‘Louie Louie’ a yega Renaissance ayera tardi pe rueda di prensa ma mira e dekor i a topa ku Shurendi Pieternella...

El a duna mi e splikashon ku Karnaval ta ‘Go Green’ i ma bai sinta...

Shurendi ta despues mi a mira ku e mesa prinsipal tabata dekorá yen di flor i ma kòrda mesora riba Beyonce...

Beyonce a saka un potrèt temporada e tabata na estado ku segun mi kasi mesun flornan...

Shurendi ta di dje ba fia òf ta e a manda pidi bu flor pe saka su potrèt? ...

Bo mes sa ‘Todo en broma, nada en serio’...

Espektativa serka miembronan di Fundashon JAG ta haltu pa loke ta trata organisashon di Karnaval 2018...

Tin algun inovashon ku nan lo bai presentá i ta kombensí ku esakinan lo bira eksitoso...

Gobièrnu, den persona di Sra. Lisette Sambo Velder ayera a anunsiá ku tei paga tur e gastunan adishonal di Karnaval 2017, pa dje forma ei Karnaval 2018 tuma lugá sin debe...

Ora ku a anunsiá esaki ma kòrda mesora riba Lisette Jansen di Fundashon di Karnaval di Bándabou i AGKK, ámbos a keda ku debe relashoná ku Karnaval 2017...

Awó mi ta kere ku Gobièrnu mester bai ‘terugwerkende kracht’ i kubri e debenan tambe di 2015 i 2016...

Nos tei move, bon siman!. Ban produsí pa adelanto di Kòrsou....