Un felis djabièrnè pa tur nos lektornan...

Kon a bai ku Sanikolas?

E siman aki tabatin basta kansion nobo ku a keda lansá...

Wikènt a kuminsá i ta basta moveshon tin...

Gio Extravaganza tei pone hopi hende kue direkshon di Spoonz e wikènt aki...

E fiesta di Oreo, ERA i Doble R tambe tin basta reakshon pe...

Ma chèk un lista ayera di presentashon di gruponan di Tambú i tambe Aguinaldo i ma keda sorprendé e kantidat di presentashonnan ku tin...

Algun siman atras ma hasi menshon dje echo ku por ehèmpel Los Originales ta atraé un públiko mas grandi na su presentashonnan

Esei te kaso tambe ku algun otro gruponan di tambú i Aguinaldo ku ta gosa di un grupo grandi di fanátiko...

E dekorashon di fin di aña tantu na Punda komo Otrobanda ta logra di atraé un kantidat grandi di hende ku ta sali kas bai keiru pa wak e dekorashon di Lus ku tin ....

Esnan riba e rotòndenan tambe ta atraé basta hende...

Nos a yega 8 di desèmber i pa awe AMAK segun nan skema lo mester ta kla ku nan preparashon pa Festival di Tumba 2018...

E pre-benta di karchi a bai masha bon i ta un indikashon fuerte ku e públiko ta sostené e festival...

Ban wak si Feco ku su tim lo tene un rueda di prensa den e siman ku ta bini òf ku e ta warda aña bòltu pa anunsiá e Festival i su spònsernan...

Mañan e partisipantenan pa Elekshon di Reina, Prens i Pancho Grandi di Karnaval di Bándabou ta bai skohe nan number di partisipashon...

Djadumingu ei nos a topa nan na e rueda di prensa di Karnaval 2018 i mester bisa ku tin un entusiasmo bou dje partisipantenan...

Bándabou ta pendiente tambe pa su di dos edishon di Festival di Tumba pa Karnaval...

Lisette Jansen i su tim ta trahando duru pa por logra rebibá e evento...

E aña aki el a bai bon i ta kestion pa e evento bira un ku ta sostené su mes kompletamente...

Pa esaki logra e partisipashon di tantu kantante i públiko di Bándabou ta hunga un ròl importante...

Sostené e festival i di mes e Karnaval di Bándabou ta sigui engrandesé...

E idea pa pone e jump up pa skolnan di Bándabou ta un sistema pa logra atraé mas hóben pa partisipá den Karnaval di Bándabou...

E trabounan pa Karnaval di Bándabou ta bastante i Lisette i su tim ta trahando duru pa ofresé pueblo di Kòrsou un Karnaval di Bándabou tur afó...

Papiando di Bándabou, ma bai Barber i a tuma nota ku ta trahando riba e asera nèt na altura di sede di FKBB i e otro banda di kaya na altura di MCB...

E kaya tei bira smal i ponementu di asera ku klenku tei trese kuné ku no ta pa loko por hisa outo benta riba asera...

LOUIE LOUIE te move. Disfrute di bo wikènt i djaluna nos tei bèk !...