Un bon siman pa tur nos lektornan...

Kon a bai ke wikènt? ...

Basta aktividat durante di fin di siman...

Un dje eventonan ku a reuní fanátikonan di Gio Fuertisimo a resultá un éksito...

Músikonan kontentu pa zona nan éksitonan i e públiko eufóriko ora ku e banda dal zona i nan ta haña chèns pa kanta i baila ...

‘Gio Extravaganza’ mester bira un pakete di fiesta anual kaminda ta bolbe uni e banda i laga e fanátikonan topa otro pa gosa di nan tempu...

Kon a bai na Japan ku Doble, Oreo i ERA...

‘Life Entertainment Center’  a habri su porta ku un tremendo fiesta, pero tin kos pa drecha...

Segun mi a mal kalkulá e trabounan pa e sentro por ta kla kompletamente i esaki a pone ku a dal bai pero tin basta kos pa drecha...

E problema prinsipal di kualke organisadó òf doño di un sitio ta e promé impreshon ku e públiko ta haña di bo lugá òf fiesta...

E públiko a reklamá kalor entre otro...

Esei te promé kos ku mester drecha pa e sitio por sigui funshoná di manera optimal...

Den pasado nos a yega di kritiká WTC i awor a toka turno na ‘Life Entertainment Center’...

By the way, algu sigur di aploudí ta e eskoho di nòmber pa e dos salanan di evento ku e edifisio tin...

Tantu Ced Ride komo Pedro ‘Hermanito’ Narvaez a keda masha kontentu ku a skohe nan nòmber pa e salanan di fiesta...

Ma tuma nota di e presentashon di Eddy Herrera na Boneiru i ku e kantante lokal Simadis Markwell a presentá kuné...

Hopi great pa e oportunidat ku Eddy Herrera ta duna na kantantenan lokal...

Algun aña atras tabata Jennifer Virginia kende a graba i presentá ku Eddy Herrera aki na Kòrsou...

E kómiko ‘Ma Yeta’ a bolbe graba un tambú...

Aña pasá pa promé biaha ‘Ma Yeta’ a graba un tambú i pe aña aki e ta interpretá e komposishon ‘Mi tei lelenan’...

E ta zona bon i ta algu pa e públiko ku gusta tambúnan ku ta toka temanan aktual...

Bon ko’i zoya sintura!...

Doña Elia Isenia ayera nochi a presentá ‘Vipé di Shon Mol’ den Zona Kultural, ántes Teatro Luna Blou...

E públiko tabata bon, pero nos ta kere ku mihó promoshon Doña Elia sigur lo a logra di atraé un públiko mas grandi...

Aktividatnan riba djadumingu anochi meresé promoshon èkstra pa por logra pa atraé públiko...

Awe ta fecha pa ‘Kuenta i Tambú’ su rueda di prensa...

Den wikènt binidero nan lo tin un presentashon na Villa Maria...

Ta kos di bai wak, nos muzik di kueru kombiná ku músika elektróniko riba nivel internashonal, presentá pa nos músikonan lokal...

Bon nos tei move! Bon siman, Kòrsou mester di bo, ban traha pa progreso di nos Pais...